2027-йил тарихдаги энг иссиқ йил бўлиши мумкин
2027-йил кузатувлар тарихидаги энг иссиқ йил бўлиши мумкин. Бу ҳақда Kontroll.hu нашри Буюк Британия Метеорология хизматига таяниб хабар берди.
Об-ҳаво хизматининг прогнозларига кўра, Тинч океанида тарихдаги энг кучли Эл Нино ҳодисаси юз бериши кутилмоқда. Океаннинг айрим қисмларида сув юзаси ҳарорати ўртача меъёрдан 3 даражадан кўпроққа кўтарилиши мумкин.
Бу 1950-йилдан бери олиб борилаётган кузатувлар тарихидаги энг юқори кўрсаткич бўлади. Айнан шу сабабли келаётган йил рекорд даражада иссиқ бўлиши кутилмоқда. Институтнинг узоқ муддатли прогнозлар бўлими раҳбари Адам Скейф бу ҳодисани мисли кўрилмаган ҳолат деб атади ва илгари бундай кучли Эл Нинони кўрмаганини таъкидлади.
Эл Нино — ҳар 2–7 йилда бир марта содир бўладиган ва тахминан бир йил давом этадиган табиий иқлим ҳодисаси. Бу даврда Тинч океани устидан шарқдан ғарбга эсадиган шамоллар кучсизланади ёки йўналишини ўзгартиради. Натижада илиқ океан сувлари шарққа қараб тарқалади. Океандан атмосферага катта миқдорда иссиқлик ажралиб чиқади, бу эса глобал ҳароратни оширади ва ёғингарчилик тартибини ўзгартириши мумкин.
Олимлар Тинч океанининг муайян ҳудудида сув юзаси ҳарорати ўртача кўрсаткичдан камида 0,5 даражага ошганда Эл Нино ҳодисасини қайд этади. Ҳозирги ўлчовлар бу фарқ 2 даражадан ошганини кўрсатмоқда.
Бу 1950-йилдан бери қайд этилган энг кучли Эл Нино ҳодисасидир. У ҳатто ХИХ асрдан бери энг қудратли ҳодиса бўлиши ҳам мумкин. Бошқа иқлим прогнозлари эса ҳарорат фарқи 4 даражагача етадиган янада кескин тебранишларни башорат қилмоқда. Аввалроқ Эл Нино яқинлашаётгани сабабли Марказий Осиёда сув тошқини хавфи ошиши мумкинлиги ҳақида хабар берилганди.