2016-йилдан буён 25 339 нафар шахс Ўзбекистон фуқаролигига қабул қилинди, 66 мингдан ортиғининг фуқаролиги тан олинди

2016-йилдан буён Ўзбекистон фуқаролигига 25 339 нафар шахс қабул қилинди, шунингдек, 66 мингдан ортиқ кишининг фуқаролиги тан олинди.

Ички ишлар вазирлиги ҳузуридаги Миграция ва Персоналлаштириш департаменти маълумотларига кўра, 2016-йил декабридан бошлаб Ўзбекистонда 25 339 нафар фуқаролиги бўлмаган шахс мамлакат фуқаролигига қабул қилинган. Бундан ташқари, 2020-йилдан 2026-йилнинг ҳозирги давригача яна 66 189 нафар шахснинг Ўзбекистон фуқаролиги тан олинган.

Хусусан, 2016-йил декабридан ҳозирги кунгача Ўзбекистон Президентининг 117 та фармони асосида жами 25 339 нафар фуқаролиги бўлмаган шахс Ўзбекистон фуқаролигига қабул қилинган.

2020-йилдан бошлаб Ўзбекистонда доимий яшовчи фуқаролиги бўлмаган шахсларнинг фуқаролигини тан олиш тартиби жорий этилган. Бу жараён қуйидаги йўналишларда амалга оширилган:

* 1995-йил 1-январгача Ўзбекистонга кўчиб келиб, доимий рўйхатдан ўтган 24 456 нафар шахснинг ҳужжатлари кўриб чиқилиб, уларга Ўзбекистон фуқаросининг паспорти ёки идентификация ИД картаси расмийлаштирилган.

* 2005-йил 1-январгача Ўзбекистонга кўчиб келиб, доимий яшаш жойи бўйича рўйхатга олинган ва илгари бошқа давлат фуқаролигида бўлмаган 22 692 нафар шахсга Ўзбекистон фуқаросининг идентификация ИД картаси берилган.

* Ўзбекистонда камида 15 йил доимий яшаб келаётган ва шу даврда бошқа давлат фуқаролигида бўлмаган шахслар, шунингдек, ота-онасидан бири Ўзбекистон фуқароси деб тан олинган, бошқа давлат фуқаролигини қабул қилмаган ва Ўзбекистонда яшаётган болаларнинг мурожаатлари асосида 19 041 нафар шахснинг ҳужжатлари кўриб чиқилиб, уларга Ўзбекистон фуқаросининг идентификация ИД картаси расмийлаштирилган.

Шу уч йўналиш бўйича жами 66 189 нафар шахснинг фуқаролиги тан олиниб, ҳужжатлаштирилган.

Ҳозирда Ўзбекистон фуқаролигини олиш истагида бўлган 1 795 нафар шахснинг мурожаатлари қонунчиликда белгиланган тартибда кўриб чиқилмоқда. Улардан 401 нафари фуқароликни тан олиш бўйича мурожаат қилган.