20 йиллик лойиҳа: Россиянинг янги космик кемаси қачон учади?
«Роскосмос» янги кўп марта фойдаланиладиган, экипажли космик кемани 2026-йил кузида парашют ёрдамида синовдан ўтказишни режалаштирмоқда. Илк экипажли парвоз эса 2028 ёки 2029-йилга мўлжалланган. Бироқ америкалик космос шарҳловчиси Эрик Бергер бу муддатга ҳозирдан ишонишга эрта деб ҳисоблайди.
**20 йиллик лойиҳа: Россиянинг янги космик кемаси қачон учади?**
Арс Течниса нашри журналисти Эрик Бергер ўзининг янги мақоласида «Роскосмос» раҳбари Дмитрий Бакановнинг Россияда ишлаб чиқилаётган истиқболли космик кема ҳақидаги баёнотига алоҳида эътибор қаратган.
Бакановнинг айтишича, 2026-йил кузида Узоқ Шарқда кемани парашют ёрдамида ташлаш синовлари ўтказилади. Корпорация биринчи экипажли парвозни 2028 ёки 2029-йилда амалга оширишни режалаштирмоқда. Учириш учун, эҳтимол, «Ангара-А5М» ракетасидан фойдаланилади.
### Лойиҳа Европа билан ҳамкорликдан бошланган
Қарийб йигирма йил аввал Россия ва Европа космик агентлиги — ЭСА янги авлод экипажли космик кемасини биргаликда яратиш масаласини муҳокама қила бошлаган.
Ўша пайтдаги келишувларга кўра, Европа олти нафаргача одамни ташишга мўлжалланган капсула учун хизмат модулини тақдим этиши керак эди.
Кейинчалик эса Европа ўз экипажли космик кемаси устидаги ишларни давом эттирмасликка қарор қилган. «Роскосмос» эса лойиҳани мустақил равишда амалга ошириш йўлини танлаган.
Лойиҳа шу вақт ичида бир неча бор номини ўзгартирган. Аввалига у «Истиқболли экипажли транспорт тизими», кейин «Янги авлод экипажли транспорт кемаси» деб аталган. Сўнгра «Федерация», ундан кейин эса «Орел» номини олган.
Бергернинг ёзишича, қарийб 20 йил давом этган ишланмалар, кўплаб ном алмашишлар ва компютерда яратилган тасвирларга қарамай, кема яратиш жараёнида амалда қандай силжиш бораётгани ҳануз ноаниқ қолмоқда.
Баканов эълон қилган парашют синовлари эса лойиҳа бўйича навбатдаги амалий қадам сифатида кўрсатилмоқда.
Америкалик шарҳловчи 2028–2029-йиллардаги парвоз санасини ҳозирданоқ тақвимга белгилашга шошилмаслик кераклигини таъкидлаган.
У бундан тўрт йил аввал Россия президенти Владимир Путин «Орел» кемаси ва Россиянинг Ой дастури қайта тикланиши ҳақида ишонч билан гапирганини эслатган. Бергернинг баҳосига кўра, ўшанда айтилган режалар ҳали кутилган натижани бермаган.