18 ёшигача ўқиш-ёзишни билмаган Кембриж собиқ профессори плагиат айбловларидан сўнг ўлик ҳолда топилди
Кембрижнинг собиқ профессори, 18 ёшигача ўқиш-ёзишни билмаган Жейсон Ардей плагиат айбловлари ортидан Лондондаги уйида ўлик ҳолда топилди. Бу ҳақда Ассосиатед Пресс хабар берди.
41 ёшли Ардей 14-август куни Лондоннинг Баттерсеа туманидаги уйида ҳушсиз ҳолатда топилган. Тез ёрдам ходимлари унинг вафот этганини тасдиқлаган. Полиция ўлимни кутилмаган ҳолат сифатида текширмоқда, аммо ҳозирча жиноят аломатлари аниқланмаган.
Ардейга уч ёшида аутизм ташхиси қўйилган бўлиб, у 11 ёшигача гапира олмаган ва 18 ёшигача ўқиш ҳамда ёзишни билмаган. Кейинчалик у докторлик даражасини олган ва 2023-йилда Кембриж университети тарихидаги энг ёш қора танли профессорга айланган эди. У таълим социологияси профессори лавозимида фаолият юритган.
Сўнгги ҳафталарда олимнинг илмий ишлари жиддий танқид остига олинган. Тҳе Тимес ва бошқа нашрлар унинг докторлик диссертациясида бошқа тадқиқотчилар ишларига ўхшаш кўплаб парчалар борлиги ҳақида ёзган. Тҳе Гуардиан маълумотларига кўра, Ардейнинг диссертацияси ва бошқа бир илмий иш ўртасида 100 дан ортиқ ўхшаш парча топилган.
Ардей плагиат қилганини рад этган. У докторлик ишида айрим хатоларга йўл қўйганини тан олган, бироқ уларнинг атайлаб қилинмаганини айтган. Унга докторлик даражасини берган Ливерпоол Жоҳн Моорес Университй томонидан ўтказилган текширувда ҳам плагиат айби тасдиқланмаган, айрим камчиликлар “ҳалол ва асосли хато” натижаси бўлиши мумкинлиги қайд этилган.
Шунга қарамай, Кембриж университети Ардейнинг 2022-йилда Таълим факултетига ишга қабул қилиниши ва кейинги фаолияти бўйича алоҳида текширув бошлаган. Олим эса 5-август куни лавозимидан истеъфога чиққан эди.
Унинг илмий ишларидан ташқари, таржимаи ҳолида келтирилган айрим маълумотлар, жумладан, хайрия учун миллионлаб фунт маблағ тўплагани ва спорт ютуқлари ҳақидаги даъволари ҳам савол остига олинган.
Ардейнинг оиласи унинг вафотидан кейин тарқатган баёнотида олим сўнгги йилларда “нотўғри маълумотлар, ҳақорат ва таъқиблар кампанияси”га дуч келганини билдирган. Оила аъзолари бу босим унга жиддий таъсир қилганини таъкидлаган.