15 ёшли ҳиндистонлик шахматчи Магнус Карлсенни мағлуб этди

Деҳлилик 15 ёшли шахматчи Вандан Аланкар Савай онлайн блиц-турнирда дунёнинг биринчи рақамли шахматчиси Магнус Карлсенни мағлуб этди. Бироқ у фаолиятидаги энг йирик ғалабалардан бирини ўта хотиржамлик билан қабул қилди ва бу ҳақда ота-онаси ёки мураббийига дарҳол айтмади.

Тимес оф Индиа нашрининг хабар беришича, ФИДЕ рейтингида 2288 очкога эга бўлган Вандан 18-август куни Chess.com сайтида ўтказилган Титлед Туесдай турнирида рейтинги 2823 га тенг бўлган Карлсенни 50-юришда таслим этган.

"Менда йўқотадиган ҳеч нарса йўқ, аксинча, ютадиган нарсам кўп эди. Мен ўзим учун қулай ўйин кўрсатишга қарор қилдим ва оқ доналарда одатий 'э4' юриши билан баҳсни бошладим", дейди Вандан.

Шахматчининг оиласи бу ғалабадан кейинроқ хабар топди. Отаси Аланкар Савай тасодифан Chess.com сайтига кирганида ўғлининг натижасини кўриб қолган. Онасининг айтишича, Вандан бошида бу турнирда қатнашишни умуман истамаган экан.

"Турмуш ўртоғим билан уйда эдик, Вандан келиб, турнирда ўйнаганини айтди. Отаси қандай натижа бўлганини сўраганидангина, у Карлсенга қарши ўйнаб, ғалаба қозонганини айтди. Аслида Вандан мусобақада қатнашишни истамаганди. Биз уни ўйнашга мажбур қилгандик", дейди онаси.

Ёш шахматчининг мураббийи Гурпреет Пал Сингх ҳам шогирдининг ғалабасидан эртасига хабар топган. Карлсен билан тўқнашувдан сўнг Вандан яна иккита раунд ўйнаган ва жами 4 та ўйиндан иборат иштирокини 3 ғалаба ҳамда 1 мағлубият билан якунлаб, чарчагани сабабли ухлашга ётган.

Иккинчи босқичда Карлсен билан тўқнаш келган Вандан машҳур рақибидан умуман чўчимади ва ўзининг одатий ўйинини кўрсатди. Беш дақиқалик баҳсда ҳиндистонлик йигитча вақтдан унумли фойдаланди. Ванданнинг фили Карлсеннинг шоҳига хавф солган бир вазиятда, норвегиялик спортчи хатога йўл қўйди ва устунликни рақибига бой бериб қўйди.

"У қўпол хатога йўл қўйганида, ҳайратда қолдим", дейди ёш шахматчи.

Вандан билан етти йилдан бери ишлаб келаётган мураббий Сингх уни доска ортида агрессив, аммо ҳаётда жуда босиқ ва камгап йигит сифатида таърифлайди. Шахматга қизиқиш Ванданда оиласидан ўтган — онаси ёшлигида акаси билан шахмат ўйнаганини айтиб, фарзандига ҳам бу ўйинни ўргатган. Кейинчалик иқтидори сезилгач, уни мураббий Сингхга олиб келишган.