“130 кишилик гуруҳдан 12 киши тирик қолдик”. Россия-Украина урушида қатнашган фарғоналик йигитга суд ҳукми ўқилди
“130 кишилик гуруҳдан 12 киши тирик қолдик”. Россия-Украина урушида қатнашган фарғоналик йигитга суд ҳукми ўқилди
Фарғона вилояти Қува туманида Россия Қуролли кучлари сафида Украинага қарши жанг қилган 25 ёшли йигитга суд ҳукми чиқарилди.
Маълум бўлишича, Р.Б. 2023-йил 4-ноябр куни ишлаш мақсадида Россия Федерациясига борган ва аввалига қабртош тайёрлаш сехида ишлаган. Декабр охирларида эса Москва вилоятининг Балашиха шаҳрида ишлаётган отасининг ёнига кўчиб ўтган.
Шу ерда у Беларус фуқароси бўлган таниши Россия Қуролли кучлари билан шартнома тузиб, Украинадаги жанговар ҳаракатларда қатнашаётганини эшитган. Унинг таклифига кўра, 2024-йил 23-февралда шартнома имзолаган.
Ўша пайтда моддий жиҳатдан оғир аҳволда эдим, қарзларим кўплиги сабаб уларни қандай тўлашни ўйлаб боши қотган эди. Ўша вақтда шартнома имзолаш энг тўғри йўлдек туюлган, дейди Р.Б. ўз кўрсатмасида.
Шартнома имзолангач, Р.Б. феврал охири ва март бошларида ҳарбий тайёргарликдан ўтган. Шундан сўнг 10-март куни Украинанинг Луганск вилоятидаги жанговар ҳаракатларга юборилган.
“130 кишилик гуруҳ билан жанг майдонига кирдик”
У аввал жанговар техникалар ёрдамида жангларда қатнашган. Кейин 130 кишилик пиёда гуруҳ таркибида жанг майдонига кирган. Украина ҳарбийларининг қарши ҳужуми натижасида гуруҳдаги 117 киши ҳалок бўлган.
Ўзим ва яна 12 киши тирик қайтдик. Жанг майдонидан қайтгач, бизга уч кун дам берилди. Кейин яна бошқа 48 кишилик пиёда гуруҳи таркибида бошқа жанговар ҳаракатларга юборилдик, дейди Р.Б.
2024-йил 15-апрелда Украина армияси дрони ҳужуми оқибатида унинг ўнг қўли яраланган. Шундан сўнг у икки ҳафта госпиталда даволанган ва 30-апрел куни яна жанговар ҳаракатлар ҳудудига юборилган. Кейинги жангларда снаряд зарбасидан оёғидан ҳам яраланганига қарамай, 2024-йил кузига қадар ҳимоя гуруҳи таркибида урушда иштирок этган.
Иккала оёқ тос суяги емирилиши ташхиси қўйилган
2024-йил сентябр ойида Р.Б. тиббий кўрикдан ўтиш учун Москвадаги ҳарбий госпиталга юборилган. Шифокорлар унга икки оёқ тос суяги емирилиши ташхисини қўйиб, жарроҳлик амалиёти зарурлигини билдирган. Шундан кейин у ҳарбий қисмга қайтиб, жанговар ҳаракатларда эмас, асосан штаб ишларида хизмат қилган.
2025-йил 16-апрелда Москвадаги ҳарбий госпиталда унинг чап оёғи тос қисми операция қилинган. Икки ой даволаниб, вақтинча хизматга яроқсизлик таътилида бўлганидан сўнг июн ойида яна ҳарбий қисмга қайтган.
Июл ойида шартнома муддати тугагач, у Россия Қуролли кучлари сафидан чиқарилган. Кейин Москвага бориб, иккинчи оёғини операция қилдириш учун навбатини кутган. Ўша пайтда ижара уйида онаси ва синглиси билан яшаган.
Россия фуқароси бўлмаганим сабабли навбатим келган бўлса-да, иккинчи жарроҳлик амалиётини ўтказишга рухсат берилмади. Узоқ вақт самарасиз кутгач, оилам билан Фарғонага, уйимизга қайтишга қарор қилдик. Ҳужжатларимни йўқотиб қўйганим сабабли жорий йил март-апрел ойларида Ўзбекистоннинг Москвадаги элчихонасига ёрдам сўраб мурожаат қилдим, дейди Р.Б. ўз кўрсатмасида.
Элчихона унга 2026-йил 1-май куни “Ватанга қайтиш гувоҳномаси”ни расмийлаштириб берганидан ўн кун ўтиб, яъни 11-май куни Ўзбекистонга қайтиб келган.
20-май куни туман ички ишлар бўлими ходимлари уни суҳбатга чақирган. Суҳбат давомида Россияда ҳарбий хизмат ўтагани ва жанговар ҳаракатларда қатнашгани билан боғлиқ ҳолатлар ҳақида сўзлаб берган. Шунингдек, ўзида сақланаётган ҳарбий ҳужжатларни ихтиёрий равишда топширган.
Судда Р.Б. қилган ишидан чин дилдан пушаймонлигини билдириб, ўзига енгиллик беришни сўраган.
Жиноят ишлари бўйича Қува тумани суди Р.B.ni Жиноят кодексининг 154-моддаси 1-қисми (Ёлланиш) билан айбдор деб топган. Унга Жиноят кодексининг 57-моддаси қўлланиб, 3 йил муддатга озодликни чеклаш жазоси тайинланган.