100 минг долларлик илтимос. Трамп Грециядаги элчисидан нега воз кечди?
АҚШнинг Афинадаги элчиси Кимберли Гилфойл Оқ уй талаби билан истеъфога чиқди. Бунга сабаб бўлган Валл Стреет Жоурналънинг суриштирувларида элчи хоним пул, совға ва хизматлар эвазига Трамп маъмурияти расмийларига йўл очиб беришни таклиф қилгани айтилади. Бир пайтлар Трампнинг ўғлига унаштирилган Гилфойл эса айбловларни рад этмоқда.
100 минг долларлик илтимос. Трамп Грециядаги элчисидан нега воз кечди?
Кимберли Гилфойл узоқ йиллар давомида АҚШ президенти Доналд Трамп атрофидаги энг машҳур шахслардан бири бўлиб келган. У Сан-Франсиско ва Лос-Анжелесда прокурор сифатида ишлаган, кейин Фох Невс телеканали бошловчиси сифатида танилган. Бир вақтлар у ҳозирги Калифорния губернатори Гевин Нюсомга турмушга чиққан, кейинроқ эса президентнинг тўнғич ўғли кичик Доналд Трампга унаштирилган.
57 ёшли Гилфойл Трампнинг иккинчи муддатида номзоди кўрсатилган илк элчилардан бири эди. АҚШ Сенати уни 2025-йил сентабрда тасдиқлаган, у эса 1-ноябрда Афинага келган. Яъни у элчи сифатида бир йил ҳам ишламади. Энди эса у катта можаро ортидан лавозимни тарк этмоқда.
Ҳал қилувчи лаҳза 13-октабр куни Оқ уйдаги брифингда юз берди.
Оқ уйнинг янги матбуот котиби Кети Закария ўзининг илк брифингида бу мавзудаги саволга жавобан шундай деди:
«Биз элчи Гилфойлдан истеъфога чиқишни сўрадик. У жамоа учун жуда қадрли ходим бўлди, унга омад тилаймиз»
Коррупсион можаролар: Элчи нега бўшатилди?
Гилфойлнинг қулаши бир неча ҳафта аввал бошланган. Сентабр ойида Валл Стреет Жоурнал элчининг Болқондаги энергетика битимлари билан боғлиқ эҳтимолий манфаатлар тўқнашуви ҳақида ёзганди. Октабр бошида эса жараён тезлашди ва газета янги материаллар чоп этди. Улардаги асосий даъволарни уч гуруҳга ажратиш мумкин, бироқ уларнинг ҳеч бири ҳозирча расман исботланмаган.
Биринчиси — юнон бизнеси билан яқинлик. ВСЖ маълумотига кўра, элчи Актор номли қурилиш ва энергетика компаниясининг лоббисти Христос Марафацосни хорижий расмийлар билан учрашувларга олиб кирган. У Актор иштирокидаги қўшма корхонанинг Америка суюлтирилган газини сотиб олиш бўйича 20 йиллик битимини Жануби-Шарқий Европа давлатларида фаол тарғиб қилган.
Элчи юнон тадбиркорларининг хусусий самолётларида ҳам учган. Актор адвокати эса «элчи доимо АҚШ манфаатларини илгари суриб келган», деган.