1-сентабрдан иш ҳақи ва стипендиялар оширилади
Ўзбекистонда 2026-йил 1-сентабрдан бюджет ташкилотлари ходимларининг иш ҳақи ва стипендиялар миқдори 7 фоизга оширилади. Шу санадан меҳнатга ҳақ тўлашнинг энг кам миқдори ойига 1 млн 360 минг сўм, базавий ҳисоблаш миқдори эса 440 минг сўм этиб белгиланади.
1-сентабрдан бошлаб иш ҳақи ва стипендиялар миқдори оширилади.
Бу ҳақда Президентнинг 2026-йил 23-июндаги "Иш ҳақи, пенсиялар, стипендиялар ва нафақалар миқдорини ошириш тўғрисида"ги ПФ–115-сонли фармонида кўрсатилган.
Ҳужжатга биноан, 1-сентабрдан бошлаб бюджет ташкилотлари ходимларининг иш ҳақи 7 фоизга оширилади. Талабаларга бериладиган стипендиялар миқдори ҳам худди шундай 7 фоизга кўпаяди.
Шунингдек, 1-сентабрдан бошлаб меҳнатга ҳақ тўлашнинг энг кам миқдори ҳозирги 1 миллион 271 минг сўмдан 1 миллион 360 минг сўмга кўтарилади.
Базавий ҳисоблаш миқдори эса 412 минг сўмдан 440 минг сўмга оширилади.
Базавий ҳисоблаш миқдори, жумладан, қонунчиликда белгиланган айрим давлат божлари, йиғимлар, жарималар ва бошқа тўловларни ҳисоблашда қўлланилади.
Фармон билан пенсия ва нафақаларни оширишнинг бошқа муддати белгиланган эди. Улар 2026-йил 1-июлдан 7 фоизга оширилган. Хусусан, ёшга доир энг кам пенсия ойига 983 минг сўм, ногиронлик пенсияларининг энг кам миқдори 1 миллион 83 минг сўм, пенсияни ҳисоблашнинг базавий миқдори эса 504 минг сўм этиб белгиланган.
Иш ҳақи, пенсия, стипендия ва нафақалар миқдорини ошириш билан боғлиқ харажатлар Давлат бюджети ҳамда Иқтисодиёт ва молия вазирлиги ҳузуридаги бюджетдан ташқари Пенсия жамғармаси маблағлари ҳисобидан қопланади.