Хитойда собиқ қўриқчи 8-уринишда нуфузли университет талабаси бўлди

Хитойда собиқ қўриқчи саккизинчи уринишда нуфузли Синҳуа университети магистратурасига қабул қилинди. Унинг мақсади Гарвард университетида ПҳД дастурини ўқишдир. Бу ҳақда Соутҳ Чина Морнинг Пост хабар берди.

31 ёшли Янг Хиао болалигидан Синҳуа университетида ўқишни орзу қилган. 2013-йилда миллий кириш имтиҳони – гаокаони топшириб, Марказий тасвирий санъат академиясига ўқишга кирган. 2018-йилда ўқишни тамомлагач, Шенянг шаҳрида санъат мактабини очган. Кўп ўтмай, болаликдаги орзуси ва севгилисига берган ваъдаси туфайли Синҳуа университети магистратурасига ҳужжат топширган, аммо биринчи уринишида имтиҳондан йиқилган.

Шунга қарамай, у севгилисига магистратурада ўқишни бошлаганини айтган, Янг кейинги йили албатта ўқишга киришига ишонган. Бироқ иккинчи уриниш ҳам муваффақияциз тугаган. Учинчи тайёргарлик йили давомида Янг интернет орқали танишган аёл билан муносабат ўрнатган. Аёл касаллик ва қимордаги қарзларини баҳона қилиб ундан мунтазам пул сўраган. Натижада Янг 1 миллион юандан (150 минг АҚШ долларидан) ортиқ маблағидан айрилган.

Муносабатлар якунлангач, у катта қарзга ботган, магистратурага ҳам кира олмаган. Ота-онаси қарзини ёпишга ёрдам берган, санъат мактаби эса ёпилган.

Кейинги йилларда Янг магистратура имтиҳонидан жуда оз фарқ билан йиқилган. Тирикчилик қилиш учун аввал фаррош, кейин эса Синҳуа кампусидаги халқаро талабалар ётоқхонасида қўриқчи бўлиб ишлаган. Бир куни бегона аёл фарзандига Янгни кўрсатиб: “Яхши ўқимасанг, сен ҳам унга ўхшаб қоласан”, дегани унга туртки берган.

Эркак кундузи яширинча университет маърузаларини тинглаган, кечалари эса хорижлик талабалар билан инглиз тилини машқ қилган. Кейинчалик у университетнинг хавфсизлик гуруҳига раҳбар бўлган. Бу унга кўпроқ маош, енгилроқ иш ва ўқишга кўпроқ вақт ажратиш имконини берган.

Янгнинг айтишича, қўриқчи бўлиб ишлаш унинг меҳнат ва одамларга бўлган муносабатини ўзгартирган. Камтарона ҳаёт кечирганига қарамай, у бир сафар илмий семинарда қатнашиш учун барча жамғармасини авиачипта харидига сарфлаган. Кейинчалик бу унга бир нечта илмий мукофотларни қўлга киритишга ёрдам берган.

2026-йил июн ойида, саккиз йиллик уринишлардан сўнг Янг Синҳуа университетининг Санъат ва дизайн академияси магистратурасига қабул қилинди. Магистратура одатда уч йил давом этади. Бироқ у молиявий сабабларга кўра ўқишни икки йилда тамомлашни режалаштирмоқда. Унинг навбатдаги мақсади эса Гарвард университетида номоддий маданий мерос йўналишида тўлиқ молиялаштириладиган ПҳД дастурида таҳсил олишдан иборат.

Аввалроқ Полшада эркак 9 йилда 139 та уринишдан сўнг ҳайдовчилик имтиҳонидан ўтгани маълум қилинганди. Шунингдек, Хитойда миллионер университетга кириш учун 27-марта имтиҳон топшириб, ундан йиқилгани маълум бўлганди.