Валверде Моуринё ҳақида: “Унинг бундай инсон эканини кутмаган эдим”

Валверде Моуринё ҳақида: "Унинг бундай инсон эканини кутмаган эдим"

Мадриднинг "Реал" клуби сардори Федерико Валверде жамоанинг янги бош мураббийи Жозе Моуринё билан ишлаш ва машғулотлар жараёни ҳақидаги фикрларини билдирди.

"У билан ўтказган дастлабки кунларимдан келиб чиқиб айцам, Моуринёнинг бундай инсон бўлиб чиқишини кутмаган эдим. У футболчиларга жуда самимий муносабатда бўлади. Баъзида ўта талабчан ва қаттиққўл бўлиши ҳам мумкин, аммо айнан шу жиҳат бизни янада кучлироқ бўлишга ундайди. Унинг бутун жамоага ва шахсан менга бўлган муносабати ёқади", деди Валверде.

Валверденинг сўзларига кўра, жамоа аъзолари янги мураббийлар штабининг ишидан тўлиқ қониқиш ҳосил қилган:

"Мен ундан кўпроқ нарса ўрганишга ҳамда мураббий ва унинг штаби билан ўтадиган ҳар бир машғулотдан максимал даражада фойда олишга ҳаракат қиляпман. Футболчиларнинг барчаси ҳозирги ҳолатдан мамнун. Сардор сифатида барча жамоадошларим ўзини яхши ва эркин ҳис қилаётганидан хурсандман".

Маълумот ўрнида, "Реал" ўртоқлик учрашуви доирасида Венгриянинг "Ференсварош" клубига қарши майдонга тушган эди. Будапештда бўлиб ўтган ушбу баҳс Жозе Моуринё шогирдларининг 2:1 ҳисобидаги ғалабаси билан якунланди.