Украина Лукашенкога жиноий иш қўзғатишни кўриб чиқмоқда
Украина Лукашенкога нисбатан жиноий иш очиш масаласини кўриб чиқмоқда.
Украина президенти Владимир Зеленскийнинг идораси Бош прокуратурадан Беларус президенти Александр Лукашенкога қарши жиноий иш қўзғатиш имкониятини ўрганиб чиқишни сўради. Бу ҳақда Реутерс агентлиги хабар берди.
Россия президенти Владимир Путиннинг яқин иттифоқчиси бўлган Лукашенко 2022-йил феврал ойида Москвага Беларус ҳудудидан Украинага кенг кўламли ҳужум қилиш учун старт майдони сифатида фойдаланишга рухсат берган эди.
Украина президенти идорасининг мактубида айтилишича, бу сўров сургундаги мухолифат гуруҳи – “Беларус демократик кучлари форуми”нинг мурожаатига жавобдир. Мазкур форум май ойида Зеленскийга мактуб йўллаб, Украинани Лукашенкони ҳарбий жиноятлар, геноцид ва давлат террори учун жавобгарликка тортишга чақирганди. Шу муносабат билан Бош прокуратурадан Лукашенкога қарши жиноий иш қўзғатиш имкониятини кўриб чиқиш сўралган.
Форум Беларус президентини Россиянинг Украинага қарши урушида шерикликда ва камида 2442 нафар украиналик болани ноқонуний равишда Беларусга олиб ўтганликда айблади. Мазкур ҳолат Ел университетининг Гуманитар тадқиқотлар лабораторияси томонидан ҳужжатлаштирилган. 2023-йилда Лукашенко Беларус уруш туфайли жароҳат олган болаларга ёрдам бериш учун Украинадан уларни вақтинча қабул қилганини айтган.
Ҳозирча Лукашенконинг Украина судида жавобгарликка тортилиши эҳтимоли паст, аммо унга қарши ҳар қандай айбловлар “Киев ва Беларус мухолифати томонидан Ғарбнинг унга нисбатан босимини ушлаб туриш учун далил сифатида ишлатилиши мумкин”.
Зеленский феврал ойидан бери Лукашенкога нисбатан риторикасини кескин кучайтирди ва унга қарши санксиялар киритди. Шунингдек, президент уни Украинага ҳужум қилиш ниятида айблаб келмоқда. Лукашенко эса буни рад этиб, Беларус фақат Киев биринчи бўлиб ҳужум қилган тақдирдагина урушга киришини таъкидлаган.