Трамп Патриот бўйича қарорни кечиктирмоқда
АҚШ президенти Доналд Трамп Украинага Патриот зенит-ракета мажмуаларини ишлаб чиқариш лицензиясини бериш масаласи ҳали якуний ҳал этилмаганини билдирди. Унинг сўзларига кўра, Вашингтон бу масалани ўрганмоқда, бироқ мазкур технология стратегик аҳамиятга эга бўлгани учун қарор қабул қилишда эҳтиёткорлик талаб этилади.
Трамп Патриот тизимлари бўйича қарорни кечиктирмоқда. Бу ҳақда у Тҳе Финансиал Тимес нашрига берган интервюсида маълум қилди.
АҚШ президенти Патриот тизимларини "ўта ноёб қурол" деб атаб, Қўшма Штатлар бундай ҳарбий технологияларга лицензия беришда жуда эҳтиёткор ёндашишини таъкидлади.
"Бу жуда муҳим қурол. Лицензияларни кимга бериш масаласида эҳтиёткор бўлишимиз керак. Умуман олганда, биз ҳарбий ускуналар учун лицензияларни тез-тез бермаймиз", — деди Трамп.
Бу баёнот Трампнинг Украина президенти Володимир Зеленский билан Оқ уйда ўтказган учрашувидан икки кун ўтиб янгради. Зеленский мазкур мулоқотни самарали деб баҳолаб, унда Патриот тизими учун тутиб қолувчи ракеталарни биргаликда ишлаб чиқариш ва бошқа мудофаа лойиҳалари муҳокама қилинганини айтган эди. Шунингдек, у Патриот ишлаб чиқарувчи компаниялар вакиллари билан ҳам учрашганини маълум қилиб, қўшма ишлаб чиқариш йўлга қўйилишига умид билдирган.
Маълумот учун, Патриот тизимлари АҚШнинг Лоскҳеед Мартин ва РТХ компаниялари томонидан ишлаб чиқарилади.
Трамп интервю давомида АҚШнинг асосий мақсади Украинага янада кўпроқ қурол етказиб бериш эмас, балки Россия ва Украина ўртасидаги урушни якунлаш эканини таъкидлади. Унинг айтишича, АҚШ президентининг махсус вакили Стивен Уиткофф ҳамда Жаред Кушнер яқин кунларда биринчи марта Украинага ташриф буюради.
"Биз ракеталар ҳақида эмас, урушни тўхтатиш ҳақида ўйлаяпмиз. Бизга тинчлик керак", — деди Трамп.
Шу билан бирга, Россиянинг навбатдаги оммавий ҳужумларидан сўнг Украина президенти Володимир Зеленский халқаро ҳамкорларга ҳаво ҳужумидан мудофаа воситалари бўйича ёрдам сўраб мурожаат қилди. Унинг маълум қилишича, Россия бир кечада Украинага 70 дан ортиқ ракета, асосан баллистик ракеталар, ҳамда 280 дан зиёд зарбали дронларни учирган.
Зеленскийнинг таъкидлашича, мамлакат аҳолиси хавфсизлиги кўп жиҳатдан ҳамкор давлатларнинг, айниқса Патриот тизимлари учун ракета захирасига эга АҚШ ва бошқа мамлакатларнинг кўмагига боғлиқ.