Трамп киберхавф сабаб Хитойдан роботлар импортини тақиқлади

Трамп маъмурияти киберхавфсизликни таъминлаш мақсадида Хитойдан роботлар импортини чеклади.

АҚШ ҳукумати сунъий интеллект соҳасини ва миллий хавфсизликни киберҳужумлардан ҳимоя қилиш мақсадида Хитойнинг гуманоид роботлари ва инверторларини мамлакатга олиб киришни тақиқлади.

Бу қарор АҚШ Федерал алоқа комиссияси (ФАК) томонидан қабул қилинди. Тақиқ Хитойда ишлаб чиқарилган янги одамсимон ва тўрт оёқли роботларга, шунингдек, қайта тикланувчи энергия манбаларини тармоққа улаш учун ишлатиладиган инверторларга нисбатан қўлланади.

**Тақиқ сабаблари**

Америка расмийлари Хитой қурилмалари орқали маълумотлар ўғирланиши ва киберҳужумлар уюштирилишидан хавотирда. ФАК раиси Брендан Каррнинг таъкидлашича, бу қурилмалар АҚШ иқтисодиёти ва муҳим инфратузилмаси учун хавф туғдиради.

Тақиқ энди ишлаб чиқариладиган янги моделларга тегишли. Бироқ комиссия илгари рухсат берилган моделларни ҳам сотувдан олиб ташлаш ҳуқуқига эга. АҚШнинг бу қарорига Хитой элчихонаси қуйидагича муносабат билдирди:

“Вашингтон Хитой компанияларини қоралашни ва уларга санксиялар билан таҳдид қилишни тўхтатиши керак. Пекин ўз манфаатларини ҳимоя қилиш учун барча зарур чораларни кўради”.

**Қайси компаниялар зарар кўради?**

Чеклов биринчи навбатда Хитойнинг Унитрее компаниясига таъсир қилиши кутилмоқда. Бу компания жаҳон гуманоид роботлар бозорининг қарийб бешдан бир қисмини эгаллаб турибди. АҚШ расмийлари бундай роботлар мамлакат ичида жосуслик қилиши ёки масофадан туриб муҳим обьектлар ишини бузиши мумкинлигидан хавотирда. Шунингдек, тақиқ инвертор ишлаб чиқарувчи Сунгров ва Ҳуавеи компанияларига ҳам тааллуқлидир.