Тошкентда эшик тирқишидан кириб, дўкон кассасини тунаган ўсмир жиноят устида ушланди
Тошкентда дўкон кассасидан пул ўғирлаган ўсмир жиноят жойида қўлга олинди. Бу ҳақда Тошкент шаҳар ИИБ ахборот хизмати маълум қилди.
Хабарга кўра, вояга етмаган шахс дўкон эшигидаги тирқиш орқали ичкарига кириб, кассадан 6 миллион 185 минг сўм пулни ўғирлаган. Тунги хизматни олиб бораётган қўриқлаш хизмати ходимлари унинг шубҳали ҳаракатларини пайқаб, воқеа жойидан узоқлашишга улгурмасидан уни ушлаганлар ва бу ҳақда навбатчилик қисмига хабар берганлар.
Текширувлар натижасида гумонланувчи томонидан ўғирланган 6 миллион 185 минг сўм дўкон эгасига тўлиқ қайтарилган.
Ҳолатни ўрганиш жараёнида мазкур дўкон ва унинг атрофидаги бир қатор савдо шохобчалари қўриқлаш хизмати тизимига уланмагани аниқланган. Шундан сўнг тадбиркорлар билан профилактик тушунтириш ишлари олиб борилиб, уларни қўриқлаш хизматига улаш чоралари кўрилган. Хусусан, ўғрилик содир бўлган дўкон эгаси ҳам қўриқлаш хизмати билан шартнома тузган.
Жиноятнинг фош этилишига ҳисса қўшган ходимлар ички ишлар органлари раҳбарияти томонидан тақдирланган.
Аввалроқ Жиззахда қоровул ўзи ишлаётган корхонада 4 йил давомида жами 91 дона электр генератори ва тикув машиналарини ўғирлагани аниқланганди. Бошқа бир ҳолатда эса Бухорода 60 дан ортиқ фуқаронинг пулларини ўзлаштирган гуруҳ аъзолари қўлга олинган эди.