Тошкентда бирга яшаган аёлининг 5 ойлик чақалоғини уриб ўлдирган эркак 16 йилга қамалди
Тошкент шаҳрида бирга яшаган аёлининг 5 ойлик чақалоғини уриб ўлдирган 29 ёшли эркак 16 йилга озодликдан маҳрум этилди.
“Дарё” танишган суд ҳужжатларига кўра, воқеа 2026-йил 14-феврал куни соат 19:00 ларда Р.M.ning Яшнобод туманидаги хонадонида содир бўлган.
Ўша куни Р. спиртли ичимлик истеъмол қилиб, уйга қайтгач мастлик таъсирида ухлаб қолган. Ухлаётган эркакни кечга яқин беш ойлик чақалоқнинг тинимсиз йиғиси уйғотиб юборган. Шунда у аёлига болани тинчлатишни сўраб бақиради. Бироқ уйда аёлининг йўқлиги ва телефонига жавоб бермаганидан жаҳли чиқади.
Фарзанди туғилгач, менга муносабати совуқлашди. Баъзан қаерга кетаётганини айтмасдан уйдан чиқиб кетар, телефонини ҳам ўчириб қўярди. Шундан кейин уни хиёнатда гумон қила бошладим. Телефонидан ҳомиладор бўлганидан кейин уни ташлаб кетган эски таниши билан ёзишмаларини топдим. Агар мен билан яшамоқчи бўлса, бошқа эркаклар билан гаплашмаслигини қатъий айтдим. Ўша куни уйга кирганимда бола ёлғиз йиғлаб ётганини кўрдим. Онасини изладим, тополмадим. Телефони ўчиқ, дугоналари эса бирга эмаслигини айтди. Шунда хаёлимга эски таниши олдига кетди, деб ўйлаб, рашким кела бошлади”, дея кўрсатув берган Р.М.
Унинг айтишича, бола тинмай йиғлагани учун уни тинчлантириш мақсадида юзига кафтининг орқа томони билан бир неча марта урган. Бироқ тинчланмагач, елкаси ва бўйнидан ушлаб бир неча бор силтаган, кейин коляскага ётқизиб, яна пиво олиш учун дўконга чиқиб кетган.
Уйга қайтгач эса хонадондаги сукунатдан шубҳаланиб, болага қараган. Унинг кўкариб қолганини кўргач, томир уришини ва нафас олишини текширган. Бироқ унда ҳаёт аломатлари сезилмагач, тез ёрдам чақирган. Машина кечикаётгани сабаб гўдакни кўтариб кўчага чиққан ва йўлда келаётган тез ёрдамни тўхтатиб, унда шифохонага етиб борган. Аммо шифокорлар чақалоқ вафот этгани маълум қилишган.
Суд-тиббий экспертизаси хулосасига кўра, чақалоқнинг ўлимига ёпиқ бош жароҳати ва мияга қон қуйилиши сабаб бўлган. Экспертизада гўдакда пневмония, миокардит ва гепатит каби хасталиклар бўлса-да, ўлим айнан зарбалар оқибатида юзага келганини билдирилган.
Судда аёл воқеа содир бўлган куни танишининг уйига борганини айтиб, телефони бузилганлиги сабабли ўчиқ бўлганини билдирган. Шунингдек, у боласини эркакка ишонгани учун уйда қолдириб кетганлигини маълум қилган.
“Бирга яшашни бошлаганимизда болани ўз фарзандидек кўришини билдирганди. Ҳодиса юз бергунча ҳам унга нисбатан яхши муносабатда эди. Шу сабабли уни 5 ойлик чақалоққа зарар етказиши мумкинлиги хаёлимга ҳам келтирмагандим”, дейди аёл ўз кўрсатувида.
Суд Р.М. беш ойлик чақалоқ ўзини ҳимоя қила олмаслигини ва катта одамнинг зарбалари унга жиддий шикаст етказиши мумкинлигини англаганини тан олиб, қилмишидан пушаймонлигини билдириб, суддан енгиллик сўраган.
Р.М. Жиноят ишлари бўйича Яшнобод туман судининг ҳукми билан Жиноят кодексининг 97-моддаси 2-қисми “в” банди (айбдорга аён бўлган ожиз аҳволдаги шахсни қасддан ўлдириш) билан айбдор деб топган. Унга нисбатан 16 йил муддатга озодликдан маҳрум қилиш жазоси тайинланган.
Аввалроқ Самарқандда 2 ёшли боланинг ўлимига сабабчи бўлган она ва ўгай ота жавобгарликка тортилганди . Суд уларга нисбатан 11 йил ва 8 йил муддатга озодликдан маҳрум қилиш жазоси тайинлаганди.
Абубакр Одилжонов