Тошкент вилоятида ЙПХ ходимига 5 млн сўм пора беришга уринган маст ҳайдовчи ушланди

Тошкент вилоятининг Ўрта Чирчиқ туманида маст ҳолатда машина бошқарган ҳайдовчи йўл ҳаракати қоидабузарлигини яшириш мақсадида ЙПХ ходимига 5 миллион сўм пора беришга уринган вақтида қўлга олинди. Бу ҳақда Йўл ҳаракати хавфсизлиги хизмати ахборот хизмати маълум қилди.

Жорий йилнинг 7-июл куни Ўрта Чирчиқ тумани Қорасув маҳалласида хизмат олиб бораётган ЙПХ инспектори Собалт русумли автомобилни тўхтатган. Ҳайдовчининг ҳужжатларини текшириш жараёнида инспекторда унинг спиртли ичимлик истеъмол қилганлиги бўйича шубҳа пайдо бўлган. Ҳайдовчи спиртли ичимлик ичганини тан олган, бироқ тиббий кўрикдан ўтишдан бош тортган. Шундан сўнг инспектор маъмурий баённома тузиб, автомобилни вақтинчалик сақлаш учун жарима майдончасига жойлаштирган.

Жазодан қутулиш ниятида ҳайдовчи инспекторга пул таклиф қила бошлаган. Ходимнинг бу ҳақда билдиргисига асосан тезкор тадбир ўтказилган. Натижада ҳайдовчи ЙПХ ходимига 5 миллион сўм миқдоридаги пулларни пора сифатида бераётган вақтда ашёвий далиллар билан ушланган.

Мазкур ҳолат юзасидан Ўрта Чирчиқ туман прокуратураси томонидан Жиноят кодексининг 211-моддаси (пора бериш) 1-қисми билан жиноят иши қўзғатилган бўлиб, ҳозирда тергов ҳаракатлари олиб борилмоқда.

Аввалроқ ижтимоий тармоқларда ЙПХ ходими билан келишмовчилик видеосини жойлаштирган ҳайдовчининг узр сўрагани хабар қилинган эди. Шунингдек, Жиззахда 100 минг сўм пора олган ППХ инспектори 20,6 миллион сўм жаримага тортилгани ҳам маълум қилинган.