Судланганлиги бўлган мигрантларга Россия фуқаролигини олиш тақиқланди
14 ёшга тўлган мигрантлар ИИВ ҳудудий органларига судланмаганлиги тўғрисида маълумотнома тақдим этишлари шарт бўлади.
Россия Федерацияси президенти Владимир Путин томонидан имзоланган янги қонунга кўра, судланганлиги бўлган муҳожирларга Россия фуқаролигини олиш ёки вақтинчалик яшаш ҳуқуқини қўлга киритиш тақиқланди.
Қонун Россия ҳудудида ёки ундан ташқарида содир этилган жиноятлар учун судланганлиги бекор қилинмаган чет эл фуқаролари ва фуқаролиги бўлмаган шахсларга Россия фуқаролигини беришни ман этади. Шунингдек, уларга вақтинчалик яшаш учун рухсатнома бериш ҳам рад этилади.
Бундан ташқари, 14 ёшга тўлган муҳожирлар Ички ишлар вазирлигининг ҳудудий бўлинмаларига судланмаганликлари тўғрисида маълумотнома тақдим этишлари шарт.
Ушбу талаб қуйидаги тоифадаги чет эл фуқароларига нисбатан қўлланилмайди: қочқин деб тан олинганлар, сиёсий ёки вақтинчалик бошпана олганлар, 14 ёшга тўлмаганлар, Россия қуролли кучлари сафида шартнома асосида хизмат қилганлар, шунингдек, илгари бундай маълумотномани тақдим этганлар.