Самарқандда эски юк машиналарни “ёшартирган” шахс 3 йилга қамалди
Самарқандда эски юк машиналарини "ёшартирган" шахс 3 йилга қамалди
Самарқанд вилоятида эски юк машиналарининг ишлаб чиқарилган йилини Андижон йўл ҳаракати хавфсизлиги бошқармасидаги танишлари орқали "ёшартириб" беришни ваъда қилиб, ҳайдовчиларни алдаган шахс 3 йилга қамалди. "Дарё" суд ҳужжатлари билан танишди.
Суд материалларига кўра, судланувчи А.Р. Жомбой туманида таъмирлаш ишларини бажараётганида эски "ГАЗ-53" русумли юк машинаси бор уста билан танишган. Мулоқот давомида уста ишлаб чиқарилганига 50 йилдан ошган машиналардан фойдаланиш чекланаётганидан хавотир билдирган. "Ҳа демай қарор кучга киради, буларни ҳайдаб бўлмай қолади. Хоҳласангиз, қайта жиҳоз қилиб, Андижондаги 'ГАИ' танишим орқали йилини янгилаб, қонуний ўзгартириш қилиб бераман," деган у машина эгасига.
Кутилмаган имкониятдан қувонган уста бу таклиф ҳақида таниши Э.L.ga ҳам етказган. 13-феврал куни Э.Л. Самарқанд шаҳридаги савдо маркази ёнида А.Р. билан учрашиб, 1975-йилда ишлаб чиқарилган "ГАЗ-53" юк машинасининг йилини янгилаш учун унга 5 миллион сўм пул ва "техпаспорт"ни берган. А.Р. барча ишлар қонуний амалга оширилишини ва ҳужжатни 10 кун ичида тайёрлаб беришини айтган.
Бироқ орадан 10 кун ўтгач, у турли баҳоналар билан "техпаспорт"ни қайтаришни кечиктирган. Март ойи бошларида эса ҳужжат тайёр бўлганини айтиб, уни эгасига берган. "Техпаспорт"да 1975-йилда ишлаб чиқарилган "ГАЗ-53"нинг йили 1988-йил қилиб ўзгартирилган, шунингдек, "бортли юк автомобили" деган маълумот ўрнига "ўзи ағдарувчи" деб ёзилган. Аммо ҳужжатдаги ўзгаришлар электрон базага киритилмаган.
Машина эгаси "техпаспорт"ни Оқдарё туманидаги техник кўрикка олиб борганида, ундаги маълумотлар электрон базада мавжуд эмаслиги ва ҳужжат сохталиги аниқланган. А.Р. шу усулда яна бир ҳайдовчига 1973-йилда ишлаб чиқарилган "ЗИЛ-130" юк машинасининг йилини янгилаб, электрон базага киритиб беришни ваъда қилган. Бунинг учун у ҳайдовчидан 400 доллар — ўша вақтда 4,8 миллион сўм пул ва машина "техпаспорт"ини олган.
А.Р. жиноий фаолиятини давом эттириб, яна бир "ГАЗ-53" юк машинаси эгасини ўзининг алдовларига ишонтирган. Бироқ келишилган 9 миллион сўм маблағни белгиланган жойда олаётган вақтида Самарқанд вилояти ИИБ Шахсий хавфсизлик бошқармаси ходимлари томонидан ўтказилган тезкор тадбирда ашёвий далиллар билан ушланган.
Суд ҳужжатларига кўра, А.Р. ҳайдовчиларга ўзини ички ишлар органларидан нафақага чиққан шахс сифатида таништирган ва "бу иш ўзидан ўзи бўлмайди, пул харажат қилиш керак," деб уларни ишонтирган.
"Аслида Андижонда ҳеч қандай танишим бўлмаган, ҳаммасини ўйлаб топганман. Менга ўша пайтда пул керак эди, уларнинг ишонувчанлиги эса менга қўл келишини билганим учун уларни алдаганман. Янада ишонтириш мақсадида 'техпаспорт'ларни уйимда махсус принтерда чиқартирганман," дея кўрсатма берган судланувчи.
Судда А.Р. айбига қисман иқрор бўлиб, қилмишидан чин кўнгилдан пушаймонлигини, ҳайдовчиларга етказилган зарар тўлиқ қопланганини билдириб, енг