Қишлоқ хўжалиги вазирлиги ва АСИР қишлоқ хўжалиги инновацияларини ривожлантириш масалаларини муҳокама қилишди

Қишлоқ хўжалиги вазирлиги ва АСИР қишлоқ хўжалиги инновацияларини ривожлантириш бўйича ҳамкорликни муҳокама қилди

Тошкент, Ўзбекистон (UzDaily.uz) — Ўзбекистон Қишлоқ хўжалиги вазири Иброҳим Абдураҳмонов АҚШнинг Тижоратлаштириш ва инновациялар тадқиқоти алянси (АСИР) асосчиси ҳамда Ўзбекистон халқаро экспертлар кенгаши аъзоси Эрик Азулай билан учрашди.

Учрашувда қишлоқ хўжалиги соҳасида инновацияларни қўллаб-қувватлаш, илмий ишланмаларни тижоратлаштириш ва халқаро грант дастурлари орқали соҳага инвестициялар жалб этиш масалалари атрофлича кўриб чиқилди.

Музокараларнинг асосий йўналишларидан бири Жаҳон банки томонидан молиялаштирилаётган МУНИС 2 дастури доирасида Қишлоқ хўжалиги вазирлиги иштирокидаги лойиҳалар сонини ошириш бўлди.

Томонлар вазирлик тизимидаги олимлар, тадқиқотчилар ва агробизнес вакиллари учун грант аризаларини тайёрлаш, тижоратлаштириш режаларини ишлаб чиқиш, бозор таҳлили ўтказиш ҳамда интеллектуал мулкни ҳимоя қилиш бўйича тизимли ўқув дастурларини ташкил этиш имкониятларини муҳокама қилдилар.

Шунингдек, вазирликнинг қишлоқ хўжалиги соҳасида инновацион экотизимни ривожлантиришга қаратилган устувор вазифалари ҳам кўриб чиқилди. Хусусан, агротехнологик стартаплар ва илмий ишланмаларни инкубация қилиш, грант дастурларини кенгайтириш, истиқболли ғояларни бозорга олиб чиқиш ҳамда халқаро тажрибани Ўзбекистон шароитига мослаштириш масалаларига алоҳида эътибор қаратилди.

Учрашувда АСИР иштирокида яқин келажакда ўқув, консалтинг ва инновацион дастурларни ишлаб чиқиш бўйича қўшма ташаббусларни амалга ошириш имкониятлари ҳам кўриб чиқилди.

Музокаралар якунида қишлоқ хўжалигида илмий тадқиқотлар натижаларини амалиётга кенг жорий этиш, инновацион ғояларни тижоратлаштириш ва халқаро ҳамкорликни мустаҳкамлаш бўйича ўзаро манфаатли ҳамкорликни янада ривожлантириш юзасидан келишувга эришилди.