Қашқадарёда янги қурилаётган кўприкнинг балкаси тушиб кетди (видео)
Қашқадарёда янги қурилаётган кўприкнинг балкаси қулаб тушди (видео)
Ижтимоий тармоқларда Қашқадарё вилояти Деҳқонобод туманида қурилаётган кўприкнинг балкаси бир томонга оғиб кетгани акс этган видео тарқалди. Автомобил йўллари давлат қўмитаси ушбу ҳолат юзасидан “Дарё”га изоҳ берди.
Воқеа 6-август куни М-39 Олмаота—Бишкек—Тошкент—Шаҳрисабз—Термиз автомобил йўлининг 1255-1315-километр (60 км) қисмини реконструксия қилиш лойиҳаси доирасидаги обьектда, Ислом тараққиёт банки ва ОПЕК жамғармаси иштирокида олиб борилаётган қурилиш-монтаж ишлари вақтида содир бўлган.
Маълум қилинишича, янги қурилаётган икки сатҳли қайрилиб олиш сунъий иншоотининг балкалари монтаж қилинаётган бўлган. Монтаж жараёнида краннинг бир томони олдин кўтарилгани сабабли балканинг иккинчи томонига ортиқча юк тушган ва натижада балка синиб, қулаб тушган.
“Кўприк балкаси (айниқса, олдиндан зўриқтирилган бетон балка) йиғиш пайтида ишдан чиқиши мумкин, чунки у дуч келадиган юк шароитлари балка мўлжалланган шароитлардан бутунлай фарқ қилиши мумкин. Балкалар одатда вертикал равишда ишлаш ва ўз оғирлигини шу ўқ бўйлаб ўтказиш учун мўлжалланган. Лойиҳа доирасида қурувчи консултант ташкилот томонидан ҳам ушбу ҳолат тасдиқланган”, дейилади расмий изоҳда.
Ҳодиса оқибатида ҳеч кимга, шунингдек, атроф-муҳитга зарар етмаган. Воқеа юзасидан қурувчи ташкилот томонидан барча бартараф этиш чоралари кўрилиб, синган балка бўлаклари обьект ҳудудидан олиб ташланган.
Ҳозирда лойиҳа Муҳандис-маслаҳатчи ташкилоти Темелсу Интернатионал Энгинееринг Сервисес Инс. компанияси мутахассислари томонидан ҳодиса сабаблари юзасидан тегишли тартибда ўрганиш ишлари бошланган.
Аввалроқ Тошкент шаҳар Мирзо Улуғбек тумани ҳудудидан ўтган Темур Малик ва Буюк Ипак йўли чорраҳасида жойлашган йўл ўтказгичнинг тиргак девори ўпирилиб тушгани ҳамда мазкур йўл қурилишига масъул бўлган 6 кишига суд ҳукми ўқилгани ҳақида хабар берилганди.