Путин ўтган йили “ҳалок бўлган” ҳаво-десант қўшинлари полковниги билан телефон орқали суҳбатлашди

Путин ўтган йили "вафот этган" деб ҳисобланган ҳаво-десант қўшинлари полковниги билан телефон орқали мулоқот қилди.

Россия президенти Владимир Путин 6-август куни 76-гвардия десант-штурм дивизияси қўмондони, полковник Абдулазиз Шихабидов билан телефон орқали суҳбатлашди. Ушбу суҳбатнинг аудиоёзуви "ТАСС" агентлиги томонидан эълон қилинди.

Суҳбат чоғида Шихабидов ўз дивизияси Донбассдаги Доброполе йўналишида жанговар вазифаларни бажараётганини маълум қилди.

Эътиборлиси, 2025-йил май ойида Шихабидовнинг вафот этгани ҳақида хабарлар тарқалган эди. У туғилган Доғистондаги бир нечта мактабда ҳатто унинг хотирасига бағишланган мотам тадбирлари ҳам ўтказилган. Бу ҳақда маҳаллий нашрларда фото ва видеолар тарқатилган, кейинчалик айрим материаллар ўчирилган.

Кейинроқ полковникнинг ўлими ҳақида айрим Россия нашрлари ва урушни қўллаб-қувватловчи З-блогерлар ҳам ёзган. Улар Шихабидов Москвадаги Троекуров қабристонига дафн этилганини билдирган, аммо унинг қандай шароитда ҳалок бўлгани ҳақида маълумот келтирилмаган.

Шу билан бирга, Шихабидовнинг ўлими расман на тасдиқланган, на рад этилган. "Агенцтво" нашри унинг шахсий ҳужжатлари, жумладан, паспорти ҳамон амал қилишини аниқлаган.

Шихабидов 2025-йил март ойида Путин томонидан 76-десант-штурм дивизияси қўмондони этиб тайинланган. Орадан икки ой ўтиб, унинг ҳалок бўлгани ҳақида хабарлар тарқала бошлаган.

76-гвардия десант-штурм дивизияси Россия-Украина уруши бошланган дастлабки даврда Буча ҳудудида бўлган. Журналистик суриштирувларда мазкур дивизиянинг айрим ҳарбий хизматчилари Бучада тинч аҳоли ўлдирилиши билан боғлиқ эпизодларда тилга олинган.

Сўнгги вақтларда Россия Украинадаги ҳарбий ҳаракатларни кучайтириш ва армия таркибини кенгайтириш бўйича қатор қарорлар қабул қилмоқда. Июл ойида Путин Россия армияси сонини ошириш тўғрисидаги фармонни имзолади. Шунингдек, Реутерс Кремл Украинадаги урушни кучайтириш ниятида экани ҳақида хабар берган эди.