Покистонда жангарилар полиция постига ҳужум қилди: жами 26 киши ҳалок бўлди

Покистонда жангариларнинг полиция постига ҳужуми оқибатида жами 26 киши ҳалок бўлди.

29-июл куни Покистоннинг шимолий ҳудудида қуролли жангарилар полиция постига ҳужум қилди. Реутерс ва Ал Жазеера хабарига кўра, дронлар ва пистирмадан фойдаланилган ушбу ҳужумда камида 11 нафар полиция ходими ҳаётдан кўз юмган.

Бу, сўнгги бир ҳафта ичида содир бўлган иккинчи шунга ўхшаш ҳужумдир. Воқеа кечқурун, Афғонистон чегарасига яқин жойлашган Хайбер-Пахтунхва провинсиясининг Ҳангу туманида юз берган. Бу ҳудудда узоқ вақтдан бери қуролли гуруҳлар фаолият юритиб келади. Туман полиция бошлиғи Мужаҳид Ҳусайннинг маълум қилишича, ҳужумчилар полициянинг учта автомобилини ёқиб юборган ва яна бирини олиб қочган.

Полиция баёнотига кўра, жангарилар дастлаб постга квадрокоптерларга ўрнатилган қўлбола портловчи мосламалар билан зарба берган, сўнгра пистирма уюштирган. Провинсия полицияси бошлиғи Зулфиқор Ҳамиднинг сўзларига кўра, бир неча соат давом этган отишмада 11 нафар полициячи ва 15 нафар ҳужумчи ҳалок бўлган. Ҳозирча ушбу ҳужум учун ҳеч бир гуруҳ жавобгарликни ўз зиммасига олмади.

Афғонистон ва Покистон ўртасидаги зиддият туфайли чегара ҳудудларида жангарилар фаоллиги сезиларли даражада ошган. Улар асосан ҳарбийлар ва полициячиларни нишонга олмоқда. Исломободнинг таъкидлашича, жангарилар Покистондаги ҳужумларни режалаштириш ва тайёрлаш учун Афғонистондаги хавфсиз бошпаналардан фойдаланади. Афғонистондаги “Толибон” ҳукумати эса бу айбловни рад этиб, ҳодисани Покистоннинг ички муаммоси деб атайди.

Ушбу ҳодисадан аввалроқ, 7-июл куни Балужистон провинсиясида ўнлаб жангарилар тунда полиция постига ҳужум қилган эди. Натижада юзага келган йирик отишмада 9 нафар полиция ходими ҳалок бўлган, бир неча киши яраланган. Шунингдек, ҳужумчилар саккиз нафар полициячини ўғирлаб кетган, бироқ кейинчалик уларнинг барчаси хавфсизлик кучлари томонидан қутқарилган.