Перунинг 15 йилга қамалган собиқ президенти оқланиб озодликка чиқди
Перунинг собиқ президенти Олланта Ҳумала 15 йиллик қамоқ жазосидан оқланиб, озодликка чиқарилди. Бу ҳақда ББС хабар берди. Перу Конституциявий суди унга 2025-йилда коррупсия айби билан берилган ҳукмни бекор қилди.
2011-йилдан 2016-йилгача мамлакатни бошқарган Олланта Ҳумала 2025-йилда қамоқ жазосига ҳукм қилинган эди. Унга 2006 ва 2011-йиллардаги сайлов кампаниялари учун Венесуела президенти ва Бразилиянинг "Одебречт" қурилиш компаниясидан ноқонуний маблағ олганлик айби қўйилган эди.
Собиқ президент ҳукм устидан шикоят қилишини билдирган эди. Яқинда Перу Конституциявий суди унга қарши қўзғатилган барча жиноий ишларни ҳақиқий эмас деб топди. Ҳумала 31-июл куни кечқурун пойтахт Лимадаги Барбадило қамоқхонасидан озод этилди. Уни қамоқхона ташқарисида кўплаб тарафдорлари кутиб олди.
Суд қароридан сўнг Ҳумаланинг адвокати Ҳулио Эспиноса Гоена ижтимоий тармоқда баёнот берди. Унинг ёзишича, суд мижозининг сайлов кампаниялари учун олган пулларини "пул ювиш жинояти эмас" деб топган. Адвокатнинг таъкидлашича, "Айни пайтда ишни кўриб чиқаётган Жиноий палата суд жараёнини якуний бекор қилиши ва собиқ президент Олланта Ҳумалани озод этиши керак".
Ҳумала судланган пайтда унинг рафиқаси Надин Эредия ҳам пул ювишда айбдор деб топилиб, 15 йиллик қамоқ жазосига ҳукм қилинган эди. Бироқ у Бразилия элчихонасидан бошпана сўраб, мамлакатдан хавфсиз чиқиб кетган. "Биз сиёсий ва суд таъқиби қурбони бўлдик", деди Ҳумала қамоқхона ташқарисида журналистларга.
Ҳумала "Одебречт" компанияси жанжали бўйича тергов қилинган тўрт нафар Перу президентининг биринчиси бўлди. 2001-йилдан 2006-йилгача мамлакатни бошқарган Алехандро Толедо 2025-йилда 20 йилдан ортиқ муддатга қамалган. У компаниядан 35 миллион доллар пора олганликда айбланган. Шунингдек, 1985–1990 ва 2006–2011-йилларда президент бўлган Алан Гарсия 2019-йилда ўзини ўлдирган. У "Одебречт"дан пора олганликда айбланиб ҳибсга олиниш арафасида эди.
Судда Ҳумала ва унинг рафиқаси компаниядан 3 миллион доллар ноқонуний пул олганликда айбланган эди. Бу пул 2011-йилги президентлик кампаниясига ишлатилгани айтилади. Эр-хотин Миллий партияга биргаликда асос солган эди. Шунингдек, улар 2006-йилги кампания учун Венесуела раҳбари Уго Чавесдан 200 минг доллар олганликда айбланган. Аммо эр-хотин ҳар доим ўзларини сиёсий таъқиб қурбони деб билган.
Собиқ армия зобити бўлган Ҳумала 2000-йилда танилган эди. Ўшанда у ўша пайтдаги президент Алберто Фухиморига қарши қисқа муддатли ҳарбий исён кўтарган. 2006-йилда у президентликка номзодини қўйган. Унинг дастури Венесуела раҳбари Чавеснинг социалистик инқилобидан илҳомланганди. Биринчи омадсиз уринишдан кейин Ҳумала 2011-йилда яна номзод бўлди. Бу сафар у мўтадилроқ йўлни танлади ва Бразилия президенти Луис Инасиу Лула да Силванинг сиёсатига тақлид қилди. Натижада у ўнг қанот вакили Кейко Фухиморини — Алберто Фухиморининг катта қизини мағлуб этди.
Унинг қонуний муаммолари 2016-йилда ваколат муддати тугагач бошланди. Ўшанда "Одебречт" Лотин Америкаси амалдорлари ва сиёсий партияларига юзлаб миллион доллар пора берганини тан олди. Маълумот ўрнида, Перуда 29-июн куни илк бор аёл киши президентликка сайланган. Ҳозирда мамлакатни Кейко Фухимори бошқармоқда.