Ўзбекистондан Россияга яширинча 446 та қимматбаҳо тош олиб борган эркак 10 ойга қамалди
Россиянинг Домодедово аеропортида Ўзбекистондан учган йўловчининг юки, чўнтаклари ва&нбсп;ички кийимидан 2,5 млн рубл қийматидаги зумрад ва&нбсп;бошқа тошлар топилди. Суд контрабандада айбланган 54 ёшли эркакни манзил-колонияда 10 ойлик қамоқ жазосига ҳукм қилди.
Ўзбекистонлик эркак Россияга яширинча 446 та қимматбаҳо тош олиб борганлиги учун 10 ойга қамалди. ТАСС хабарига кўра, бу ҳақда Россия Федерал божхона хизмати (ФБХ) маълум қилган.
Маълум қилинишича, Домодедово аеропорти божхоначилари 54 ёшли эркакни яшил йўлакда тўхтатган. Инспекторлар унинг чемоданида рентген ускунаси ёрдамида 32 дона яшил рангли тошни аниқлаган. “Чет эл фуқароси жинси шимининг чўнтакларидан металл пластина билан бирга турли шакл, ранг ва ҳажмдаги 313 та минерални чиқариб берди. Эркакнинг ички кийимидан эса ичида яна 101 та тош бўлган зип-пакет топилди”, — деб хабар берди ФБХ.
Йўловчи қимматбаҳо тошларни ўз заргарлик фирмаси учун намуна сифатида олиб келаётганини ва декларация тўлдириш зарурлиги ҳақида билмаганини тушунтирган. ФБХ экспертизаси ушбу пластина 960 пробали кумушдан ясалганини, минераллар эса зумрад, апатит, турмалин ва синтетик муассанитлар эканини аниқлаган.
Товарларнинг умумий қиймати 2,5 миллион рубл (32,2 минг доллар)ни ташкил этади. Суд йирик ҳажмдаги стратегик муҳим ресурслар контрабандаси бўйича жиноят иши юзасидан эркакка манзил-колонияда 10 ой муддатга озодликдан маҳрум қилиш жазосини тайинлади.