Ўзбекистонда ярим йилда 195 та инфратузилма обьекти фойдаланишга топширилди

Ўзбекистонда жорий йилнинг биринчи ярмида 195 та инфратузилма обьекти ишга туширилди. Бу ҳақда Иқтисодиёт ва молия вазирлиги маълум қилди.

Ушбу обьектлар 2026–2028 йилларга мўлжалланган Ижтимоий ва ишлаб чиқариш инфратузилмасини ривожлантириш дастури доирасида фойдаланишга топширилган. Дастурни 2026 йилда амалга ошириш учун бюджет тизимидан 23,9 триллион сўм ажратилиши режалаштирилган. Бу маблағлар мамлакатнинг барча ҳудудларида ижтимоий ва ишлаб чиқариш инфратузилмаси обьектларини қуриш, реконструксия қилиш ва модернизация қилишга йўналтирилмоқда.

Ҳозирда 2 мингта обьектда қурилиш, реконструксия ва капитал таъмирлаш ишлари давом этмоқда. Йилнинг дастлабки олти ойида лойиҳа-қидирув ишлари, қарздорликларни қоплаш ва бошқа харажатлар учун 1,324 триллион сўм сарфланди, бу йиллик молиялаштириш лимитининг 40,3 фоизини ташкил этади. Бажарилган қурилиш-монтаж ишлари ҳажми эса 12,369 триллион сўмга етди.

Ҳисобот даврида таълим, соғлиқни сақлаш, муҳандислик-коммунал, транспорт ва сув хўжалиги инфратузилмаси обьектлари қурилиши якунланди.

Таълим соҳасида янги мактаблар, мактабгача таълим муассасалари ва олий таълим муассасалари фойдаланишга топширилиб, 6 722 та ўқувчи ўрни ва 1 940 та мактабгача таълим муассасаси ўрни яратилди.

Соғлиқни сақлаш тизимида бир сменада 465 нафар беморни қабул қилиш имкониятига эга амбулатория муассасалари ҳамда 696 ўринли стационар тиббий муассасалар ишга туширилди.

Коммунал соҳада 61,5 километр ичимлик суви таъминоти ва канализация тармоқлари, шунингдек, 65,9 километр иссиқлик тармоқлари ҳамда янги муҳандислик иншоотлари фойдаланишга топширилди.

Транспорт соҳасида янги автомобил йўллари ва йўл инфратузилмаси обьектлари қурилиши якунланди. Сув хўжалиги соҳасида эса 435,8 километр каналлар ва 80,1 километр коллекторлар фойдаланишга топширилди.

Шунингдек, махсус ва кичик саноат зоналарининг ташқи инфратузилма обьектлари, қирғоқларни мустаҳкамлаш иншоотлари, маъмурий бинолар, мудофаа ва ҳуқуқни муҳофаза қилиш соҳаси обьектлари, шунингдек, туризм инфратузилмаси обьектлари қурилиши ҳам якунланди.

Иқтисодиёт ва молия вазирлиги дастурни амалга ошириш аҳолини замонавий инфратузилма билан таъминлаш даражасини ошириш, ҳудудларнинг иқтисодий салоҳиятини мустаҳкамлаш ва янги иш ўринлари яратишга қаратилганини таъкидлади. Вазирлик лойиҳаларни амалга ошириш муддатлари ва сифати, шунингдек, бюджет маблағларидан самарали фойдаланиш устидан мониторингни давом эттирмоқда.