Ўзбекистонда меҳнат рухсатномасисиз ишлаган хорижликлар жавобгарликка тортилади
Олий Мажлис Қонунчилик палатасида «Ўзбекистон Республикасининг Маъмурий жавобгарлик тўғрисидаги кодексига ўзгартириш ва қўшимчалар киритиш ҳақида»ги қонун лойиҳаси биринчи ўқишда кўриб чиқилди. Муҳокамаларда қайд этилишича, кейинги йилларда мамлакатда виза бериш ва хорижий фуқароларни рўйхатдан ўтказиш тартибининг соддалаштирилиши, шунингдек, туризм соҳасида яратилган имтиёзлар натижасида Ўзбекистонга келаётган чет...
Ўзбекистонда меҳнат рухсатномасисиз фаолият юритаётган хорижликлар жавобгарликка тортилади. Олий Мажлис Қонунчилик палатасида «Ўзбекистон Республикасининг Маъмурий жавобгарлик тўғрисидаги кодексига ўзгартириш ва қўшимчалар киритиш ҳақида»ги қонун лойиҳаси биринчи ўқишда кўриб чиқилди.
Муҳокамаларда таъкидланганидек, сўнгги йилларда мамлакатда виза бериш ва хорижий фуқароларни рўйхатдан ўтказиш жараёнининг соддалаштирилиши, шунингдек, туризм соҳасида яратилган имтиёзлар натижасида Ўзбекистонга келаётган чет эл фуқаролари ва фуқаролиги бўлмаган шахслар сони ошиб бормоқда.
Бироқ, айрим хорижий фуқаролар ва доимий равишда бошқа давлатларда яшовчи фуқаролиги бўлмаган шахслар меҳнат фаолиятини амалга ошириш ҳуқуқини берувчи тасдиқнома олмадан ишлаётганлиги қайд этилди. Шунингдек, тасдиқномада кўрсатилмаган меҳнат турлари билан шуғулланиш ҳолатлари ҳам мавжуд.
Қонун лойиҳасига кўра, Ўзбекистон ҳудудида тасдиқномасиз меҳнат фаолияти билан шуғулланган хорижий фуқаролар ва фуқаролиги бўлмаган шахслар учун маъмурий жавобгарлик жорий этилиши таклиф этилмоқда. Шунингдек, тасдиқномада назарда тутилмаган меҳнат фаолияти билан шуғулланиш учун ҳам жавобгарлик белгиланиши кўзда тутилган.
Лойиҳага асосан, мазкур турдаги маъмурий ҳуқуқбузарликларга оид ишларни кўриб чиқиш ваколати Давлат меҳнат инспексияси, ички ишлар органлари ва жиноят ишлари бўйича судларга берилиши таклиф қилинмоқда.
Депутатлар таъкидлашича, қонун лойиҳаси меҳнат муносабатлари соҳасидаги ҳуқуқбузарликларнинг олдини олиш, қонуний меҳнат бозорини шакллантириш ва фуқароларнинг меҳнат ҳуқуқларини ишончли ҳимоя қилишга хизмат қилади.
Ушбу қонун лойиҳаси биринчи ўқишда қабул қилинди.