Ўзбекистон аеропортлари 2026-йил биринчи ярмида йўловчи оқимини 16 фоизга оширди
2026-йил 1-ярмида Ўзбекистон аеропортлари 64,8 мингдан ортиқ ёки ўтган йилнинг шу даврига нисбатан 8 фоизга кўпроқ рейсга хизмат кўрсатди. Жами рейсларнинг 47,3 мингдан зиёди халқаро, 17,4 мингдан кўпи ички йўналишларга тўғри келган. Йўловчи ташиш ҳажми 8,153 млн кишини ташкил этиб, 16 фоизга ошган.
Ўзбекистон аеропортлари 2026-йилнинг биринчи ярмида йўловчи ташиш ҳажмини 16 фоизга оширди. Бу даврда жами 64 831 та рейсга хизмат кўрсатилган бўлиб, бу ўтган йилнинг шу даврига нисбатан 8 фоизга кўпроқдир. Бу ҳақда "Узбекистан Аирпорц" матбуот хизмати маълум қилди. Хизмат кўрсатилган рейсларнинг 47 371 таси халқаро, 17 460 таси эса ички йўналишларга тўғри келади.
Йўловчилар сони 8 153 470 кишини ташкил этиб, 16 фоизга ўсган. Халқаро рейслар орқали 6 698 358 нафар, ички рейслар орқали эса 1 455 112 нафар йўловчи ташилган. Юк ва почта ташиш ҳажми 51 546 тоннага етиб, 2025-йилнинг биринчи ярмига нисбатан 33 фоизга кўпайган.
Анъанавий тарзда энг катта ташиш ҳажми Тошкент халқаро аеропорти ҳиссасига тўғри келди. Ушбу аеропорт 40 283 та рейсга (+7%), 5 364 282 нафар йўловчига (+17%) ва 48 170 тонна юк ҳамда почтага (+33%) хизмат кўрсатди. Компания пойтахт аеропортидаги ўсишни йўналишлар тармоғининг кенгайиши билан изоҳлади.
Ҳудудий аеропортлар орасида Андижон аеропортида йўловчи оқимининг энг юқори ўсиши (+2249%) кузатилди. Бу кескин ўсиш аеропортнинг кенг кўламли реконструксиядан сўнг фаолиятини қайта бошлагани билан боғлиқ. Андижон аеропорти 2025-йил 20-март куни аеродром мажмуаси тўлиқ янгилангандан сўнг қайта очилган эди. Модернизация ишлари замонавий кенг фюзеляжли ҳаво кемаларини қабул қилиш имконини берди. Шу сабабли, 2026-йилнинг биринчи ярми кўрсаткичлари аеропорт ҳали тўлиқ қувват билан ишламаган давр билан таққосланмоқда.
Шунингдек, Термиз (+52%), Урганч (+24%) ва Нукус (+23%) аеропортларида ҳам сезиларли ўсиш қайд этилди. Бу аеропортларда йўловчи оқимининг ошишига халқаро йўналишларда янги рейсларнинг очилиши, шунингдек, сайёҳлик мавсумида юқори талаб туфайли ички қатновлар сонининг кўпайиши сабаб бўлди.
Бироқ, Фарғона (рейслар сони 11 фоизга камайган), Наманган (-11% йўловчилар бўйича), Қарши (-6% рейслар бўйича, -22% йўловчилар бўйича) ва Навоий (-27% йўловчилар бўйича) аеропортларида айрим кўрсаткичларнинг пасайиши кузатилди. "Узбекистан Аирпорц" хабарига кўра, бу ҳолат йўналишлар тармоғи таркибидаги ўзгаришлар, айрим йўналишларда талабнинг қайта шаклланиши, шунингдек, жорий геосиёсий вазият таъсирида авиакомпаниялар томонидан парвоз жадвалларининг қайта кўриб чиқилиши билан боғлиқ.
Эслатиб ўтамиз, 2026-йилнинг январ-март ойларида Ўзбекистон аеропортлари 4 миллионга яқин йўловчига хизмат кўрсатган бўлиб, бу ўтган йилнинг шу даврига нисбатан 19 фоизга кўпдир.