Олимпиада ва спорт мусобақалари ғолиблари Ўзбекистон бўйлаб саёҳат билан рағбатлантирилади
Республика фан олимпиадалари ва спорт мусобақалари ғолибларига "Ўзбекистон бўйлаб саёҳат" йўлланмаларини тақдим этиш тартиби тасдиқланди. Ҳужжат йўлланмаларни олиш механизмини, саёҳатларни ташкил этиш тартибини ва мамлакат бўйлаб икки ва уч кунлик саёҳатларга бора оладиган иштирокчилар доирасини белгилайди.
Олимпиада ва спорт мусобақаларида ғолиб бўлганлар Ўзбекистон бўйлаб саёҳат қилиш имконияти билан тақдирланади.
Вазирлар Маҳкамасининг 24.07.2026 йилдаги 406-сонли қарори билан Таълим ва спорт йўналишларида ўтказиладиган фан олимпиадалари ва спорт мусобақалари ғолибларини "Ўзбекистон бўйлаб саёҳат" йўлланмаси билан рағбатлантириш тартиби тўғрисидаги низом тасдиқланди.
Ёшлар ўртасида республика миқёсида ўтказиладиган спорт мусобақалари ғолибларини "Ўзбекистон бўйлаб саёҳат" йўлланмаси билан қўшимча тақдирлашни жорий этиш 15.05.2025 йилдаги ПФ-87-сонли Фармонда кўзда тутилган эди.
Ушбу ҳужжат қуйидаги тартибларни белгилайди:
* "Ўзбекистон бўйлаб саёҳат" йўлланмасини олиш учун ариза бериш жараёни;
* саёҳатларни ташкил этиш ва ташкилотчиларнинг мажбуриятлари;
* саёҳатчиларнинг ҳуқуқ ва мажбуриятлари.
"Ўзбекистон бўйлаб саёҳат" йўлланмаси республика ва вилоят даражаларида (мос равишда уч ва икки кунлик саёҳатлар) қуйидагиларга берилади:
* давлат ва нодавлат умумий ўрта таълим ташкилотлари, ўқув лицейлари ва профессионал таълим ташкилотлари ўқувчилари ўртасида умумтаълим фанлари бўйича фан олимпиадалари ва/ёки спорт мусобақалари ғолибларига;
* республика олий таълим ташкилотларининг фан олимпиадалари ва спорт мусобақалари ғолибларига;
* ўсмирлар ва ёшлар ўртасида ўтказиладиган "Янги Ўзбекистон – Олимпия чўққилари" спорт мусобақалари ғолибларига.
Мактабгача ва мактаб таълими вазирлиги, Олий таълим, фан ва инновациялар вазирлиги ҳамда Спорт вазирлиги ҳар йили 15 апрелга қадар фан олимпиадалари ва спорт мусобақалари ғолибларининг белгиланган манзилларга бориш жадвалини тасдиқлайди.
Ташкилотчилар томонидан тасдиқланган сафарлар жадвалига мувофиқ, ҳар йили июн ва июл ойларида саёҳатлар ташкил этилади. Бунда туроператор ва ташкилотчи ўртасида туристик тадбирлар ва хизматларни ташкил этиш ҳамда кўрсатиш тўғрисида белгиланган тартибда шартнома тузилади.
Ҳужжат Қонун ҳужжатлари маълумотлари миллий базасида эълон қилинган ва 27.07.2026 йилдан кучга кирди.
Лола Абдуазимова