«Одиссея» филми 1,1 млрд доллар даромад келтирди — Ноланнинг янги рекорди
Ноланнинг аввалги рекордчиси — «Қора рицар: Қайта туғилиш афсонаси» филмидан тушган даромад 1,085 млрд долларни
Кристофер Ноланнинг «Одиссея» филми жаҳон миқёсида 1,104 миллиард доллар даромад тўплаб, режиссёрнинг фаолиятидаги энг юқори касса йиғимига эга филмга айланди. Бу ҳақда Тҳе Гуардиан нашри Универсал Пистурес маълумотларига таяниб хабар берди.
«Одиссея» Ноланнинг аввалги рекордини янгилади, бу рекорд 2012-йилда 1,085 миллиард доллар даромад келтирган «Қора рицар: Қайта туғилиш афсонаси» филмига тегишли эди. Режиссёрнинг энг кўп даромад келтирган филмлари рўйхатида учинчи ўринни 2008-йилда чиққан «Қора рицар» эгаллаб турибди, унинг жаҳон прокатидаги тушуми 1,005 миллиард долларни ташкил этган.
«Одиссея» филмининг премьераси 17-июл куни бўлиб ўтган. Филм Гомернинг машҳур достонига асосланган бўлиб, Троя уруши тугаганидан сўнг Одиссейнинг ўз ватани Итакага қайтишини ҳикоя қилади. Унинг уйига етиб бориши 10 йил давом этади.
Филмда бош ролни Метт Деймон ижро этган. Шунингдек, картинада Энн Ҳетеуей, Роберт Паттинсон, Зендея, Том Ҳолланд, Шарлиз Терон ва Лупита Нионго каби актёрлар суратга тушган.
«Одиссея» премьерадан сўнг жаҳон прокатида биринчи ўринни эгаллади ва кетма-кет икки ҳафта охирида энг кўп томоша қилинган филм бўлиб қолди. Универсал Пистурес маълумотларига кўра, ушбу картина Деймон, Ҳетеуей ва Паттинсоннинг фаолиятидаги энг даромадли филмга ҳам айланган.
Нолан филмнинг режиссёри ва ссенаристи бўлиш билан бирга, Эмма Томас билан ҳамкорликда унинг продюсери ҳам бўлган. Филмнинг ишлаб чиқариш буджети, реклама ва тарғибот харажатларини ҳисобга олмаганда, тахминан 250 миллион долларга баҳоланган.
«Одиссея» 2026-йилда Универсал Пистурес киностудиясининг жаҳон прокатида 1 миллиард долларлик чегарадан ошган учинчи филми бўлди. Бунгача «Супер Марио: Галактик кино» ва «Майкл» биографик филми ушбу натижани қайд этган эди.