Неймар қачон футболчилик фаолиятини якунлаши мумкинлигини маълум қилди

Неймар футболчилик фаолиятини қачон якунлаши мумкинлигини маълум қилди.

Бразилиялик ҳужумчи Неймар ўз келажаги борасида ҳали якуний қарорга келмаганини ва декабр ойида "Сантос" билан амалдаги шартномаси тугагач, футболчилик фаолиятини якунлаши эҳтимоли борлигини айтди.

"Яна қанча вақт футбол ўйнашимни билмайман. Ҳозирча фаолиятимни якунлаш ҳақида аниқ бир тўхтамга келганим йўқ ва майдонда яна қанча ҳаракат қилишим ҳам номаълум. "Сантос" билан шартномам декабргача амал қилади. Ниятим — шартнома якунига қадар шу ерда қолиб, клуб шарафини муносиб ҳимоя қилиш. Келишув якунлангач, барчасини ҳал қиламан: "Сантос"да қоламанми, бошқа жамоага ўтаманми ёки футболчилик фаолиятимни бутунлай якунлайманми — буни ўшанда ҳал қиламан", дея Неймарнинг сўзларини келтирмоқда Глобо нашри.

Эслатиб ўтамиз, Бразилия миллий терма жамоаси 5-июл куни Ню-Ёркда бўлиб ўтган Жаҳон чемпионатининг 1/8 финал босқичида Норвегияга 1:2 ҳисобида имкониятни бой бериб, турнирни тарк этди. Ушбу учрашув Неймар учун мундиаллар тарихидаги 15-ўйин бўлди. Ўйиндан сўнг Неймар кўз ёшларини тийиб тура олмади ва терма жамоадаги фаолиятига нуқта қўйганини расман эълон қилди.

Маълумот ўрнида, 34 ёшли Неймар Бразилия терма жамоаси либосида жами 130 та учрашув ўтказиб, рақиблар дарвозасига 80 та тўп киритган. У мазкур натижаси билан миллий терма жамоа тарихидаги энг яхши тўпурар саналади. Ҳужумчи ўзининг ёрқин фаолияти давомида "Сантос"дан ташқари Испаниянинг "Барселона", Франсиянинг "ПСЖ" ҳамда Саудия Арабистонининг "Ал-Ҳилол" клубларида ҳам тўп сурган.