“Нефтчи” Франсия Лигаси ҳимоячисини ўз сафига қўшиб олди
Фарғонанинг “Нефтчи” клуби Франсиянинг “Мес” жамоасида тўп сурган Кот-дъИвуарлик ҳимоячи Коффи Куао билан шартнома имзолади.
“Нефтчи” жамоаси Франсия чемпионатидан ҳимоячи трансфер қилди
Тошкент, Ўзбекистон (UzDaily.uz) —
Фарғонанинг “Нефтчи” футбол клуби Кот-дъИвуар терма жамоаси ҳимоячиси Коффи Куао билан шартнома имзолади. Футболчи ўтган мавсумда Франсиянинг “Мес” клубида ўйнаган ва Лига 1 доирасидаги ўйинларда иштирок этган.
27 ёшли футболчи ўзининг профессионал фаолияти давомида Франсия ва Португалия чемпионатларида 200 дан ортиқ расмий ўйинда майдонга тушган. Унинг асосий ўйин позицияси марказий ҳимоячи ҳисобланади.
Куао ўз фаолиятини Португалияда бошлаган, у ерда «Витория Гимарайнш» ва “Тондела” клубларида ўйнаган. Кейинчалик у Франсияга кўчиб ўтиб, “Мес” таркибида Лига 1 ва Лига 2 мусобақаларида иштирок этган.
Трансфермаркт маълумотларига кўра, ҳимоячининг трансфер қиймати 2,5 миллион еврони ташкил этади. Бу кўрсаткич Куаони ҳозирда Ўзбекистон чемпионатида ўйнаётган футболчилар орасида энг юқори трансфер қийматига эга ўйинчига айлантирди.
Франсия чемпионатидан амалга оширилган ушбу трансфер сўнгги йилларда “Нефтчи”нинг энг муҳим трансферларидан бири бўлди. Бу трансфер Коффи Куаони Ўзбекистон Суперлигаси тарихидаги энг қиммат футболчилар қаторига ҳам киритди.