Мурожаатлар бўйича энг салбий кўрсаткичга эга 10 та банк эълон қилинди

Марказий банк 2026-йилнинг иккинчи чораги якунлари бўйича банклар фаолиятига оид шикоятлар сони бўйича энг ёмон кўрсаткичга эга бўлган 10 та банк рўйхатини эълон қилди.

2026-йилнинг иккинчи чораги давомида Марказий банкка бевосита ёки бошқа давлат идоралари орқали банклар фаолиятига доир жами 11 331 та мурожаат келиб тушган. Бу мурожаатларнинг энг кўп қисми Аво Банк ҳиссасига тўғри келди (индекс 4,42). Ундан кейинги ўринларни Бизнесни ривожлантириш банки, Микрокредитбанк ва ТБС банк эгаллади.

(Фото: Марказий банк)

Таъкидлаш жоизки, 2026-йилнинг биринчи чорагида мурожаатлар бўйича энг салбий кўрсаткичга эга бўлган 10 та банк рейтингида Бизнесни ривожлантириш банки 3,34 индекс билан биринчи ўринда қайд этилган эди.

Мурожаатлар индекси банкнинг мурожаатлар сони бўйича бозор улушини мижозлар сони бўйича бозор улушига бўлиш орқали аниқланади. Бу кўрсаткич банкнинг мижозлар базасига нисбатан мурожаатлар улуши қанчалик юқори эканлигини кўрсатади ва турли ҳажмдаги банкларни ўзаро солиштириш имконини беради.

Ушбу индекс банкнинг молиявий барқарорлиги ёки ишончлилигини баҳоламайди, балки фақат мижозлар сонига нисбатан келиб тушган мурожаатлар улушини акс эттиради. Чорак давомида 100 тадан кам мурожаат келиб тушган банклар учун индекс ҳисобланмайди.

Банкларга келиб тушган мурожаатларнинг сабабларини чуқур таҳлил қилиш, уларни кўриб чиқиш жараёнларини такомиллаштириш ҳамда мижозлар манфаатларини ҳимоя қилишга қаратилган чораларни кучайтириш тавсия этилди.

Аввалроқ, 2026-йилнинг биринчи ярмида Ўзбекистонда тижорат банкларининг соф фойдаси қарийб 4,5 триллион сўмга ошгани ҳақида хабар берилган эди.