Майкл Жексон ролини ижро этган Жаъфар Жексон Уилл Смит билан янги филмда суратга тушади

Майкл Жексоннинг жияни, поп-қирол ҳақидаги “Майкл” биографик филмида унинг ролини ижро этган Жаъфар Жексон Уилл Смит билан бирга янги Голливуд триллерида суратга тушади. Бу ҳақда “Кино mail.ru” нашри маълум қилди.

“Супермакс” деб номланган ушбу кинолойиҳани Амазон МГМ Студиос ва Мирамах студиялари биргаликда суратга олмоқда. Филмда Жаъфар Жексон билан бирга машҳур актёр Уилл Смит ва актриса Анна-София Робб ҳам иштирок этади. Картинага Девид Гордон Грин режиссёрлик қилади.

Филм сюжети қаттиқ тартибли қамоқхонада содир бўлган сирли қотиллик атрофида кечади. Уни икки федерал тергов бюроси агенти фош этиши керак бўлади. Жаъфар Жексонга қайси рол берилгани ҳозирча ошкор этилмаган, бироқ унинг қаҳрамони воқеалар ривожида асосий персонажлардан бири бўлиши кутилмоқда.

“Супермакс” филми Жаъфар Жексон учун “Майкл” картинасидан кейинги илк йирик лойиҳа бўлади. Янги триллер Приме Видео стриминг платформаси орқали томошабинларга тақдим этилиши режалаштирилган.