Киев тўлай олмайди: Россия Украина етказган зарарни Европа “бўйнига қўймоқчи”

**Киев тўлай олмайди: Россия Украина етказган зарарни Европа зиммасига юкламоқчи**

Россия Европадан Украина билан уруш натижасида етказилган зарарни қоплашни ва "ўғирланган" маблағларни қайтаришни талаб қилмоқда. Бу ҳақда Давлат Думаси Халқаро ишлар бўйича қўмитаси раисининг биринчи ўринбосари Алексей Чепа "Lenta.ru" нашрига маълум қилди.

Аввалроқ Донецк Халқ Республикасидан сенатор Александр Волошин Киев Россияга Украина Қуролли Кучлари томонидан Донбасс, Новороссия ва чегарадош ҳудудларда етказилган зарарни қоплай олмаслигини таъкидлаган эди. Унинг фикрича, бу зарарни Ғарб мамлакатлари тўлаши керак.

Депутатнинг сўзларига кўра, Россия ҳам Ғарб мамлакатлари сингари йўқотишларни қоплаш учун катта харажатлар қилади. Шу билан бирга, у Европага урушга қўшган ҳиссаси учун алоҳида талаблар қўйилишини айтди.

"Табиийки, биз ҳам катта инвестициялар киритамиз. Шунингдек, ўғирланган пулларимизни талаб қиламиз ва уларнинг барчаси бизга қайтарилади. Европадан товон пули талаб қиламиз, бу масала доимий равишда кўтарилади. Европани буни қилишга мажбурлашга кучимиз етишига мутлақо ишончимиз комил", деди Чепа.

Илгари Украина Қуролли Кучлари томонидан Россияга етказилган зарар бир триллион рублдан ошгани ҳақида хабар берилган эди. Таъкидланишича, Киев етказган зарарни аниқлаш бўйича ишлар давом этмоқда. Аввалроқ Украина президенти Владимир Зеленский Путин урушни тўхтатишга тайёр эмаслигини айтиб, Россия 500 минг кишини сафарбар этишга тайёрланаётганини маълум қилганди.