Каннаваро: Ўзбекистон терма жамоасининг ўйини яхшиланди
Фабио Каннаваро Ўзбекистон терма жамоаси ўйини яхшиланганини айтди, Конго ДРга қарши учрашув, маоши ва футболчилар мулоқоти ҳақида фикр билдирди.
Каннаваро: Ўзбекистон терма жамоаси ўйинида ижобий ўзгаришлар кузатилди
Тошкент, Ўзбекистон (UzDaily.uz) —
Ўзбекистон миллий футбол терма жамоаси бош мураббийи Фабио Каннаваронинг фикрича, у жамоага келганидан бери ўйин сифати сезиларли даражада яхшиланган. Италиялик мутахассис бу ҳақда матбуот анжуманида маълум қилди.
Каннаваро журналистларнинг "Мен келганимдан бери миллий терма жамоанинг ўйини яхшиландими?" деган саволига қатъий "Ҳа" деб жавоб берди.
Унинг сўзларига кўра, хорижлик мураббий келиши билан бир зумда ажойиб натижалар кутиш нотўғри.
"Терма жамоага хорижлик мураббий келганида, эртаси куниёқ у "Барселона" каби ўйнашини кутиш хато. Муаммо айнан шу кутилмаларда", — деди у.
Конго Демократик Республикаси терма жамоасига қарши ўртоқлик учрашувини таҳлил қилар экан, Каннаваро биринчи бўлимда жамоа юқори савияда ўйнаганини, аммо танаффусдан кейин ўйин услуби ўзгарганини таъкидлади.
"Конго Демократик Республикасига қарши ўйиннинг биринчи бўлимида Ўзбекистон яхши ўйин намойиш этди. Иккинчи бўлимда эса биз бошқача ўйнай бошладик. Бу қўрқувданми ёки бошқа сабабданми, билмайман", — дея изоҳ берди бош мураббий.
Каннаваро яна бир бор унинг йиллик маоши 4 миллион евро экани ҳақидаги хабарларни рад этди.
"Менинг йиллик маошим 4 миллион евро эмас. Ҳа, бу маълумот тез-тез тарқатилади, аммо бу ёлғон", — дея таъкидлади у.
Шунингдек, мутахассис ўйинлар давомида футболчилар ўртасида мулоқот етишмаслигига ҳам эътибор қаратди.
"Ўзбекистонлик футболчиларнинг муаммоларидан бири — улар деярли бир-бири билан мулоқот қилмайди. Илк бор ўйин вақтида футболчилар ўртасида умуман мулоқот бўлмаётганини кўриб ҳайратда қолдим. Биз шу жиҳатни ҳам яхшилашга ҳаракат қилдик", — деди Каннаваро.