Жазоирда автобус жарликка қулаб тушди, камида 25 киши ҳалок бўлди (видео)

Жазоирда йўловчи автобусининг жарликка қулаши оқибатида камида 25 киши ҳаётдан кўз юмди, 44 киши тан жароҳати олди. Бу ҳақда АБС Невс ва ББС мамлакат Фуқаро муҳофазаси хизматининг дастлабки маълумотларига таяниб хабар берди.

Воқеа 31-июл куни содир бўлган. Сетиф шаҳридан пойтахт Жазоирга йўл олган автобус пойтахтдан тахминан 50 километр узоқликдаги Эл-Карма ҳудудида сирпаниб кетиб, чуқур жарликка ағдарилган.

Фожиа жойига етиб борган қутқарувчилар ярадорларни яқин атрофдаги шифохоналарга етказишган. Мамлакат фуқаро муҳофазаси департаменти йўл-транспорт ҳодисасининг сабаблари ҳозирча номаълумлигини билдирди.

Жазоир бош вазири Сифи Гриб воқеа жойига ташриф буюриб, қутқарувчилар билан мулоқот қилган. Ҳодиса жойидан олинган видеокадрларда автобуснинг жарлик тубида ётгани акс этган. Давлат телевидениесининг хабар беришича, Жазоир президенти Абдулмажид Теббун мамлакатда уч кунлик миллий мотам эълон қилди.

Эслатиб ўтамиз, 3-июл куни Покистоннинг Балужистон провинсиясида ҳам шунга ўхшаш фожиа юз берганди. Ўшанда йўловчи автобуси маҳаллий вақт билан соат 08:00 атрофида чуқур жарликка қулаб тушиши оқибатида 40 киши ҳалок бўлган, 8 киши жароҳатланган эди.