“Жаҳон чемпионати сотиладиган товар эмас” — Буюк Британия бош вазири

Буюк Британиянинг янги бош вазири Энди Бёрнем ФИФА президенти Жанни Инфантинонинг Жаҳон чемпионати тижорат ҳуқуқларини улушларга бўлиб сотиш таклифига кескин қарши чиқди.

Бёрнемнинг таъкидлашича, футбол инвесторларга эмас, балки ҳар қандай шароитда, ёмғир ёғса ҳам, қуёш чиқса ҳам, трибунани тўлдириб, ўз жамоаларини қўллаб-қувватлайдиган мухлисларга тегишли.

"Жаҳон чемпионати сотиладиган товар эмас. Бу глобал спортдаги энг буюк мусобақа ва у ҳеч қачон ҳеч кимга тегишли бўлмаган. Бу келишувни хоҳлаганча номланг, лекин Жаҳон чемпионати сотиладиган бўлса, ҳамма нарсага хиёнат қилган бўласиз. Футбол мухлисларники. У доим шундай бўлган ва шундай бўлиб қолади", — деди Бёрнем.

Аввалроқ, ФИФА президенти Жанни Инфантино Жаҳон чемпионати тижорат ҳуқуқларидаги улушларни хусусий инвесторларга сотиш режасини ишлаб чиқаётгани ҳақида хабарлар тарқалган эди. Ушбу режага кўра, ФИФАнинг 211 та миллий ассоциацияси ва аъзоларининг ҳар бири тахминан 20 миллион долларлик улушга эга бўлиши кўзда тутилган. Ассоциациялар ўз улушларини сақлаб қолишлари ёки қўшимча даромад эвазига дарҳол сотишлари мумкин бўлади.