Испания Италия билан чегара назоратини вақтинча тиклайди
Испания 8-августдан бошлаб Италиядан келувчи йўловчилар учун портлар ва аеропортларда вақтинчалик чегара назоратини жорий этади. Бу қарор Италия билан ноқонуний миграция масаласида юзага келган келишмовчилик ортидан қабул қилинди ва дастлаб 7 сентябрга қадар амал қилади.
Испания Италия билан чегара назоратини вақтинча тиклайди. Испания Ички ишлар вазирлиги хабарига кўра, 8-августдан бошлаб Италиядан келувчи йўловчилар портлар ва аеропортларда паспорт, фуқаролик ва виза бўйича қўшимча текширувлардан ўтказилади. Бу вақтинчалик назорат чоралари камида 7-сентябргача давом этади.
Расмий Мадриднинг таъкидлашича, бу қарор Италиянинг ноқонуний мигрантлар босимига дуч келаётгани ва хавфсизлик билан боғлиқ вазиятни ҳисобга олган ҳолда қабул қилинган.
Бу чоралар Италия ўтган ҳафта Сеута шаҳрида юз берган оммавий мигрантлар оқимидан сўнг Испаниядан келувчи учинчи мамлакат фуқароларига нисбатан Шенген келишуви қоидаларини вақтинча чеклаганидан кейин жорий этилди.
Аввалроқ Испания расмийлари Римни 9-августга қадар ушбу чекловларни бекор қилишга чақириб, акс ҳолда Италиядан келувчилар учун ҳам шунга ўхшаш назорат чоралари жорий этилишидан огоҳлантирган эди.
Италия ҳукумати эса Мадриднинг "ултиматумлари"ни қабул қилмаслигини билдириб, Испания орқали келувчи учинчи мамлакат фуқароларига нисбатан жорий этилган чекловлар камида 15-августгача сақланишини маълум қилди.
Италия бош вазири Жоржа Мелони маъмуриятининг таъкидлашича, Испания расмийлари 15-август куни Сеутага мигрантларнинг янги оммавий оқими бўлиши мумкинлиги ҳақида олдиндан огоҳлантирган. Шу сабабли Рим янги хавф йўқлигига ишонч ҳосил қилмагунча чекловларни бекор қилмаслигини билдирган.
Испания Фуқаролик гвардияси ҳам ижтимоий тармоқларда 15-август куни Сеута чегарасини яна оммавий равишда кесиб ўтишга чақирувлар тарқалаётганини тасдиқлади. Бироқ бу ҳаракатда қанча одам иштирок этиши ҳозирча номаълум.
Реутерс агентлигининг қайд этишича, ҳозирги можаро Европа Иттифоқи мавжуд бўлган даврда Испания ва Италия ўртасидаги энг совуқ дипломатик муносабатлардан бирига айланган. Сўнгги ойларда икки мамлакат раҳбарлари АҚШ президенти Доналд Трамп билан ҳам ташқи сиёсат масалаларида бир неча бор баҳслашган.
Ўтган ҳафта Марокашдан ўн минглаб мигрантлар Испаниянинг Шимолий Африкадаги Сеута анклавига денгиз ва қуруқлик орқали ноқонуний равишда кириб келган эди. Шаҳар аҳолиси тахминан 85 минг нафарни ташкил этади. Мигрантлар денгиз орқали автомобил шиналари, ҳаво тўлдириладиган ҳалқалар ва бошқа қўлбола воситалар ёрдамида ўтишга уринган.
Испания Ички ишлар вазирлиги маълумотига кўра, келганларнинг асосий қисмини 30 ёшгача бўлган ёшлар ташкил этган. Чегарани бузиб ўтишга уринишлар вақтида қарийб 100 киши ҳалок бўлган.
Шундан сўнг Мадрид 2021-йилдан бери биринчи марта Сеутага қўшимча ҳарбий кучларни юборди. Шунингдек, денгиз орқали ноқонуний ўтишларни чеклаш мақсадида 500 метр узунликдаги сузувчи тўсиқ ҳам ўрнатила бошланди. Чегара бўйлаб занжирли қалқувчи буйлар жойлаштирилиб, улар орасидаги махсус йўлак орқали чегара хизмати катерлари ҳудудни сутка давомида назорат қилиши режалаштирилган.