ИШИД Афғонистонда “Толибон” амалдорини ўлдирганини даъво қилди
**ИШИД Афғонистонда “Толибон” амалдорининг ўлдирилиши учун жавобгарликни ўз зиммасига олди**
ИШИД террорчилик ташкилотининг минтақавий бўлими Афғонистон шимоли-шарқида “Толибон” мулозимига қилинган ҳужум учун жавобгарликни ўз зиммасига олди. Бу ҳақда Ал Арабия хабар берди.
Бадахшон вилояти ахборот ва маданият бошқармаси бошлиғи Забиҳуллоҳ Амирий 28-июл куни вилоят маркази Файзободга кетаётганида отиб ўлдирилган эди. Афғонистон ва Покистонда фаолият юритувчи ИШИД-Хуросон гуруҳи 29-июл куни ушбу ҳужумни амалга оширганини маълум қилди.
СИТЕ Интеллигенсе Гроуп ташкилоти келтирган баёнотда шундай дейилади: “Халифалик аскарлари диндан қайтган ъТолибонъ командирини пулемётдан ўққа тутди. Оқибатда у ва унинг бир соқчиси ҳалок бўлди”.
Забиҳуллоҳ Амирий жанубий Ҳилманд вилояти губернатори Амануддин Мансурнинг жияни бўлган. Афғонистон Ахборот ва маданият вазирлиги бу “қўрқоқона ҳужум”дан сўнг ҳужумчилардан бири ўлдирилгани ва иккинчиси қўлга олинганини маълум қилди.
Вазирликнинг 28-июл кунги баёнотида шундай дейилади: “Вазирлик ислом ҳукумати душманларига шуни эслатадики, бундай қўрқоқона ҳаракатлар бизнинг қатъий қароримиз ва енгилмас иродамизни ҳеч қачон заифлаштирмайди”.
“Толибон” расмийлари Афғонистонда хавфсизликни тиклашга ваъда берган бўлса-да, улар 2021-йилда ҳокимиятга қайтганидан бери вақти-вақти билан ҳужумлар содир бўлмоқда.
ИШИДнинг минтақавий бўлими ушбу ҳужумларнинг баъзилари учун жавобгарликни ўз зиммасига олган. Булар орасида январ ойида Кобул марказидаги хитой ресторанида содир бўлган портлаш ҳам бор. Ўшанда камида етти киши ҳалок бўлганди.
Экстремистик гуруҳ, шунингдек, 2024-йилнинг декабр ойида Кобулда амалга оширилган худкушлик портлаши учун ҳам жавобгарликни ўз бўйнига олган. Ўша ҳужумда қочқинлар ишлари бўйича вазир Халил ар-Раҳмон Ҳаққоний ҳалок бўлган. Аввалроқ Афғонистоннинг Бадахшон вилоятида “Толибон”га қарши шиддатли жанглар авж олгани ҳақида хабар берилганди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.