Имтиёзли кредит учун салкам ярим млн доллар талаб қилганлар ушланди
Улар фуқаронинг ишончига кириб, 3,5 млн АҚШ доллари миқдорида имтиёзли кредит ажратиб беришларини айтишади.
Имтиёзли кредит эвазига қарийб ярим миллион доллар сўраган шахслар қўлга олинди.
3,5 миллион долларлик кредит учун 420 минг доллар талаб қилганлар ушланди.
Тошкент шаҳрида Давлат хавфсизлик хизмати ва Иқтисодий жиноятларга қарши курашиш департаменти ходимлари ҳамкорлигида ўтказилган тезкор тадбирда кредит ажратиш билан боғлиқ ноқонуний ҳолат аниқланди.
Хусусан, хусусий аксиядорлик тижорат банкларидан бирининг Олмазор филиали банк хизматлари маркази юристи ва Тошкент вилояти Янгийўл туманида яшовчи, 1979-йилда туғилган, муқаддам судланган шахс тил бириктириб, тадбиркорлик фаолиятини бошламоқчи бўлган фуқаронинг ишончига кирган. Улар фуқарога унинг номига 3,5 миллион АҚШ доллари миқдорида имтиёзли кредит ажратиб беришларини ваъда қилишган.
Улар ўзларининг "холис" хизматлари эвазига кредит суммасининг 12 фоизини, яъни 420 минг АҚШ долларини талаб қилишган. Олдиндан 50 минг доллар олаётган вақтларида улар ашёвий далиллар билан қўлга олинди.
Ҳозирда уларга нисбатан жиноят иши қўзғатилиб, "қамоқ" эҳтиёт чораси қўлланилган. Тергов ҳаракатлари давом этмоқда.