Футболдан экран сари: Криштиану Роналду янги сериалда рол ўйнайди
Футбол юлдузи Криштиану Роналду янги сериалда суратга тушади ва ижрочи продюсерлик қилади. Бу ҳақда Тҳе Сун нашри хабар берди.
41 ёшли португалиялик футболчи "Кингсман: Махфий хизмат" филми режиссёри Метю Вон билан ҳамкорликда британиялик футбол агенти ҳақидаги "Дай 1с" номли драматик шоу устида ишламоқда. Сериалда бош роллардан бирини Демиан Люис ижро этади.
Суратга олиш ишлари Лондонда бошланган. Сериал футбол агенти Даррен Дейннинг асл ғоясига асосланган.
Роналду сериалда рол ўйнашдан ташқари, унинг ижрочи продюсери сифатида ҳам иштирок этиши кутилмоқда. "Дай 1с"да спорт ва шоу-бизнеснинг бошқа таниқли вакиллари, жумладан, собиқ франсуз футболчиси Тьерри Анри ва британиялик репер Дейв ҳам кўриниш бериши айтилмоқда.
"Дай 1с" Роналду ва Вон биргаликда асос солган УР•Марв студиясининг илк сериали бўлади. Ушбу қўшма корхона 2025-йилда ташкил этилган бўлиб, режиссёрга тегишли Марв Студиос компаниясининг шўба корхонасига айланган. Корхона ишга туширилган вақтда ҳамкорлар аллақачон иккита жангари филм ишлаб чиқаришни якунлагани ва келажакдаги лойиҳаларда инновацион технологияларни анъанавий ёндашувлар билан уйғунлаштириш ниятида экани хабар қилинган эди.
Айни пайтда Роналду Саудия Арабистонининг "Ал-Насср" клубида тўп сурмоқда. Португалия терма жамоаси Жаҳон чемпионатидаги иштирокини 1/8 финал босқичида якунлаб, турнирнинг бўлажак ғолиби Испанияга имкониятни бой берган. Бу учрашув футболчининг жаҳон чемпионатларидаги сўнгги ўйини бўлди.