ФИФА президенти ўзига қарши танқидларга жавоб қайтарди
ФИФА раҳбари Вашингтон ва Теҳрон ҳарбий зиддиятига қарамай, Эрон терма жамоаси ЖЧда қатнашганини ютуқ ўлароқ
ФИФА президенти Жанни Инфантино ўзига қаратилган танқидларга жавоб берди.
Халқаро футбол ассоциациялари федерацияси (ФИФА) президенти Жанни Инфантино сўнгги жаҳон чемпионати давомида ўзига нисбатан билдирилган танқидларга муносабат билдирди.
Ижтимоий тармоқда пост эълон қилган Инфантино АҚШ, Мексика ва Канада мезбонлигида ўтган жаҳон чемпионатини “дунёдаги энг яхши шоу” деб атади ва ҳакамлик, интизомий чоралар ҳамда бошқа можароларга оид эътирозларни рад этди.
Жаҳондаги миллионлаб мухлислар қизиқишини уйғотган жаҳон чемпионати можаролар ва баҳсли қарорлар билан ҳам эътиборга тушди.
“Аслида ҳакамларнинг баҳсли қарорлари ёки “ғалати” интизомий ҳукмлар, масалан, эҳтимолий янглиш қизил ёки сариқ карточкалар ва айрим вазиятларда футболчиларни четлатмаслик ҳақидаги кейинги қарорлар оддий амалиёт ҳисобланади ва дунёнинг энг йирик лигаларининг айримларида кенг қабул қилинади”, – дея ФИФАнинг баҳсли қарорларини оқлашга уринган Жанни Инфантино.
ФИФА раҳбари, шунингдек, Вашингтон ва Теҳрон ўртасидаги ҳарбий зиддиятга қарамай, Эрон терма жамоасининг жаҳон чемпионатида қатнашганини ютуқ деб ҳисоблади. Аммо у Эрон терма жамоасининг АҚШга виза олиш ва келиб-кетишда дуч келган қийинчиликлар масаласига тўхталмади.
Таҳлилчиларга кўра, ЖЧ-2026 сиёсатчилар кўп марта аралашган ва аралашишга уринган мусобақа сифатида тарихга кирди.
Чемпионат арафасида АҚШ президентининг махсус вакили Паоло Замполли жаҳон чемпионатида Эрон ўрнига Италия терма жамоасини киритишга уринди.
АҚШ терма жамоаси вакили Фоларин Балоган билан боғлиқ можаро эса сиёсат ва спорт чегаралари қоришиб кетганини кўрсатди.
Балоган Босния ва Герсеговинага қарши учрашувда қизил карточка олгани учун Белгия билан ўйинни ўтказиб юбориши керак эди. Бироқ ФИФА Интизом қўмитаси ФИФА Интизом кодексининг 27-моддасига таяниб, дисквалификация ижросини бир йиллик синов муддатига алмаштирди. Маълум бўлишича, АҚШ президенти Доналд Трамп Балоган масаласини қайта кўриб чиқиш юзасидан ФИФА раҳбариятига мурожаат қилгани ортидан шундай қарор қабул қилинган.
Бунинг ортидан Европа футбол уюшмалари иттифоқи (УЕФА) Балоганга нисбатан қабул қилинган қарор юзасидан ФИФАни кескин танқид қилди. УЕФА тарқатган баёнотда мазкур қарор “мисли кўрилмаган, тушунтириб бўлмайдиган ва асоссиз” деб баҳоланди.
Норвегия футбол ассоциацияси раҳбарияти эса ушбу ҳолат бўйича Трамп устидан шикоят қилиш ниятини билдирди.
Бу йилги жаҳон чемпионатининг кумуш медали совриндори Аргентина терма жамоасини ФИФА мусобақаларидан четлатишга доир петиция рекорд даражада – 23,3 миллионта овоз йиғди.
Кўп миллион сонли мухлислар ФИФА раҳбарияти ва ҳакамлар жамоасини машҳур футболчи Лионел Мессига ён босишда айблади. Хусусан, Лотин Америкаси давлатининг Швейсария ҳамда Мисрга қарши ўйинлардаги ғалабалари шубҳа уйғотган.
Дарвоқе, финал ўйинидан кейин ҳам Месси жамоадошлари можароли ҳолатни юзага келтирди. Хусусан, футболчилар Науел Молина, Леандро Паредес ва Тяго Алмада ҳамда Аргентина терма жамоаси бош мураббийи ёрдамчиси Роберто Аяла Испания футболчиларига нисбатан куч ишлатган.
Кучли норозилик ва тармоқлардаги босим ортидан ФИФА Аргентина футболчиларининг хатти-ҳаракати текширилишини маълум қилди.