«Бунёдкор» сафар ўйинига бориш учун пул топа олмаяпти
Энди клубга техник мағлубият ёзилади. Агар бу ҳолат такрорланса, «Бунёдкор» Суперлигадан четлаштирилиши мумкин. Клубдагилар президентдан ёрдам сўрамоқчи.
Тошкентнинг «Бунёдкор» футбол клуби сафар ўйинларига бориш учун маблағ топа олмаяпти, бу эса жамоанинг чуқур молиявий муаммоларини кўрсатади. Клуб ПФЛга хат юбориб, Суперлиганинг 15-тури доирасида 2-август куни «Қизилқум»га қарши Навоий вилоятида бўлиб ўтадиган ўйинга бора олмаслигини маълум қилган.
«Бунёдкор»нинг хатида таъкидланишича, клубда йўл чипталари, меҳмонхонада яшаш ва делегация аъзоларини овқатлантириш каби сафар харажатларини қоплаш учун маблағ йўқ.
ПФЛ матбуот хизматининг хабар беришича, Суперлига регламентига мувофиқ, «Қизилқум» – «Бунёдкор» учрашувида меҳмон жамоага техник мағлубият ёзилади. Агар мавсум давомида бундай ҳолат яна такрорланса, «Бунёдкор»ни Суперлига мусобақасидан четлаштириш масаласи Лига Ижроия қўмитаси кун тартибига киритилади.
Kun.uz мухбири «Бунёдкор» клуби бош директори Мурод Алиев билан боғланиб, вазиятга ойдинлик киритди. Алиев клубнинг ички чемпионат сафар ўйинларига бора олмайдиган даражада молиявий қийинчиликларни бошдан кечираётганини тасдиқлади.
Унинг сўзларига кўра, клубга биринчи чоракда 10 миллиард сўм ажратилган, шунингдек, клуб ижара ва бошқа шартномалар асосида қарийб 11 миллиард сўм ишлаб топган. Бироқ бу маблағлар клубнинг молиявий ҳолатини тиклаш учун етарли бўлмаган.
«Футболчилар ва ходимлар 6-7 ойдан бери маош олгани йўқ. Қўшимчасига Ривалдога тўланиши керак бўлган қарз ҳам бизнинг бўйнимизга қолган», – деди Алиев.
Алиевнинг таъкидлашича, клуб Ривалдога 3 йиллик маошини тўламаган ва бу «Бунёдкор»га йилига 26 миллиард сўмга тушмоқда.
«Муаммога ечим излаяпмиз. Муҳтарам президентимиздан ҳам ёрдам сўрамоқчимиз», – дея қўшимча қилди у.
Маълумот учун, «Бунёдкор» Суперлиганинг жорий мавсумида 14-турдан сўнг 19 очко билан турнир жадвалида 10-ўринда бормоқда.
Аввалроқ ФИФА Ривалдо олдидаги қарздорлик сабаб «Бунёдкор»га трансфер тақиқи қўйгани маълум бўлганди.