Беларусни Литвага боғловчи ерости туннели топилди
Литва чегарачилари мамлакат жануби-шарқида Беларусдан ўтган ерости туннелини аниқлади. Бу ҳақда ЛРТ Литва давлат чегара хизматига таяниб хабар берди.
Диаметри тахминан бир метр бўлган туннелнинг Литва томонига чиқиш жойи бўлмаган. Чегарачилар еростида туннел қазилган бўлиши мумкинлигини кўрсатувчи тупроқ тебранишларини қайд этган. Айнан шу ҳолат туннелнинг аниқланишига сабаб бўлган.
Маҳаллий ҳокимият туннелдан чет эл фуқароларини Литва ҳудудига ноқонуний ўтказиш учун фойдаланишни режалаштирганини тахмин қилмоқда. Давлат чегара хизмати раҳбари Рустамас Любаеваснинг айтишича, чегарачилар шунга ўхшаш ерости йўллари бўлиши мумкин бўлган яна “ўнлаб жойларни” аниқлаган. Мазкур туннеллар қурилишига Беларус ҳукумати алоқадор бўлиши мумкин.
“Беларус ҳукумати бунга кўз юмаётгани ёки мигрантларга бу туннелларни қазишда фаол ёрдам бераётганига деярли шубҳамиз йўқ. Эҳтимол, улар ўзлари қазишмаётгандир, лекин бу иш мигрантлар иштирокида ташкил этилаётгани аниқ”, деди Любаевас.
Унинг таъкидлашича, туннел ичидан ёғоч устунлар топилган. Любаевас Беларус чегарачилари кўмагисиз давлат чегарасига яқин ҳудудга ёғоч олиб келиш ва туннел қазиш имконсизлигини айтди.
2025-йилда худди шундай туннеллар Беларус–Полша чегарасида ҳам топилганди. Ўшанда Полша расмийлари ерости ўтиш йўлларини лойиҳалашга Яқин Шарқдан “юқори малакали” мутахассислар жалб этилганини таъкидлаган. Журналистлар бундай туннеллардан фойдаланиш Кремлнинг Европага қарши гибрид урушининг янги босқичи эканини ёзганди.
2021-йил баҳорида Беларус билан муносабатлар ёмонлашгани фонида Литва ноқонуний муҳожирлар, асосан Яқин Шарқ ва Африка мамлакатларидан келаётганлар оқими ортаётганини маълум қилди. Уларнинг барчаси мамлакатга Беларус–Литва чегараси орқали кириб келган. Кейинчалик бу Литвада йирик миграция инқирозига олиб келган.
Маълумот ўрнида, июн ойида Мексика ва АҚШ чегарасида икки давлатни боғловчи, наркотик контрабандаси учун мўлжалланган мураккаб ерости туннели аниқланганди. Унинг 300 метрдан зиёд қисми АҚШ, 240 метрдан ортиғи эса Мексика ҳудудига тўғри келади. Ерости йўлагининг чуқурлиги ҳудудга қараб 6 метрдан 17 метргача етади.