Байденнинг биограф билан шов-шувли аудиосуҳбати ошкор этилди

АҚШнинг собиқ президенти Жо Байденнинг биограф Марк Люис Звоницер билан бўлган аудиосуҳбати оммага ошкор этилди. Ушбу ёзувларда сиёсатчи махфий ҳужжатларни ўзида сақлаганини тан олган. Бу ҳақда СНН хабар берди.

Аудиосуҳбатлар Оверсигҳт Прожест ташкилоти томонидан эълон қилинди. Ташкилот суҳбатни эълон қилиш ҳуқуқини суд орқали ҳимоя қилди. Ушбу аудиоёзувлар собиқ махсус прокурор Роберт Ҳюрнинг 2024-йилги ҳисоботида келтирилган хулосаларни тасдиқлайди.

Ҳюрнинг ҳисоботида Байден махфий материалларни ошкор қилгани, унутувчанлиги ва Барак Обама маъмуриятида вице-президентлик лавозимидан кетганидан кейин ҳам махфий материалларни сақлашда давом этгани таъкидланган эди. Аудиоёзувларда Байденнинг махфий ҳужжатларни сақлаганини айтганини эшитиш мумкин.

"Улар ҳатто менда бу (махфий ҳужжат — таҳр.) борлигини билмаган ҳам", дейди собиқ президент суҳбатда.

Аудиоёзувларнинг бир нечта жойида Байден саналарни ёки воқеаларнинг баъзи тафсилотларини эслашда қийинчиликларга дуч келади. Ҳюр ўз ҳисоботида Байденни "хотираси ёмон" кекса одам сифатида тасвирлаган.

Оверсигҳт Прожест ташкилоти Адлия вазирлиги аудиони эълон қилиши кераклигини таъкидлаб, бу бўйича судда ғалаба қозонган. Байден бунга қарши курашган, аммо июл ойида ўзининг қонуний даъволарини қайтариб олган. АҚШ собиқ президентининг вакили эълон қилинган ёзувларга изоҳ беришдан бош тортди.

Бироқ, унинг матбуот котиби Ти Жей Дакло Байденнинг марҳум ўғли муҳокама қилинган ўн йил олдинги китоб учун ёзилган аудиосуҳбат шахсий экани ва улар шундай қолиши шарти билан Адлия вазирлигига тақдим этилганини эслатди.

"Позицияни ўзгартириш ва ушбу ёзувларни эълон қилиш маъмурият (АҚШ президенти Доналд Трамп маъмурияти — таҳр.) Адлия вазирлигидан сиёсий қасос учун қурол сифатида фойдаланаётганининг мисолидир", деди Дакло.

Эслатиб ўтамиз, 2023-йилда ўша пайтда АҚШ президенти бўлган Жо Байденнинг Делавер штатидаги уйида махфий ҳужжатлар топилганди. Улар гараждаги омборхонада аниқланган ва аслида архивда сақланиши керак бўлган. Ўша йили Байденга алоқадор Вашингтондаги дипломатия ва глобал ҳамкорлик марказининг қулфланган кабинетида ўнга яқин махфий ҳужжатлар топилганди. Улар орасида Америка разведкаси ҳамда Украина, Эрон ва Буюк Британияга оид брифинглар материаллари бўлган.